նախընտրելի դարձնելՄահացել է ռուս հայտնի գրող Վլադիմիր Նաբոկովի եւ Վերա Սլոնիմի միակ որդի Դմիտրին: Նա մահացել է Շվեյցարիայի Մոնտրյո քաղաքում, 78 տարեկան հասակում` չունենալով անմիջական ժառանգներ:
Դմիտրի Նաբոկովը օպերային երգիչ է եղել եւ գրական թարգմանիչ: Նա թարգմանել է հոր ստեղծագործությունները, ինչպես նաեւ հրատարակել նրա ստեղծագործությունների հետմահու պատրաստված ժողովածուները:
Հենց Դմիտրի Նաբոկովն է որոշել հրատարակել Վլադիմիր Նաբոկովի վերջին, անավարտ ստեղծագործությունը` «Լաուրան եւ նրա բնօրինակը» (The Original of Laura) վեպը: Ավագ Նաբոկովը հանձնարարել էր վառել սեւագրերը, սակայն նրա այրին դա չի արել եւ թղթերը պահպանության է հանձնել շվեյցարական բանկերից մեկին:
«Հայրս ինձ ասել է իր համար ամենակարեւոր ստեղծագործությունների անունները: Դրանցից մեկը նա համարում էր «Լաուրան»: Այն գրքի մասին, որը ցանկանում են ոչնչացնել, այդպես չեն արտահայտվում»,-այսպես է նա բացատրել հոր վեպը հրատարակելու իր որոշումը` հակառակ հեղինակի կամքի, գրում է utro.ru-ն:
