ՆախընտրելիՍիրիայում այսօր, տեղական ժամանակով ժամը 07.00-ին մեկնարկել է նոր սահմանադրության ընդունման վերաբերյալ համընդհանուր հանրաքվե, որը նախաձեռնվել է իշխանությունների կողմից:
Ինչպես նշել է Սիրիայի ՆԳՆ տեղակալ Հասան Ջալյալին, հանրաքվեն լինելու է այնպիսի պայմանների ստեղծման երաշխիքը, որոնք արժանապատիվ կյանք կապահովեն Սիրիայի բնակչության համար:
Ընտրատեղամասերը բաց կլինեն մինչեւ տեղական ժամանակով ժամը 20.00-ն: Հանրաքվեին կարող են մասնակցել քվեարկության իրավունք ունեցող ավելի քան 14,5 մլն սիրիացիները: Իշխանությունները հայատարարել են, թե ձեռնարկել են անվտանգության խստացված միջոցառումներ` ընտրական տեղամասերում ահաբեկչություններ թույլ չտալու համար:
Միաժամանակ` Ստամբուլում հաստատված սիրիական ընդդիմության առաջնորդները կոչ են արել բոյկոտել հանրաքվեն: Euronews հեռուստաընկերությունը հեռարձակել է նաեւ Թուրքիայի արտգործնախարար Ահմեդ Դավութօղլուի տեսակետը, ով զարմանք է հայտնում հանրաքվեի անցկացմամբ մի երկրում, որտեղ «մարտեր են մղվում խաղաղ ընդդիմության դեմ»:
