նախընտրելի դարձնելՀայաստանի գլխավոր դատախազությունը ներկայացրել է այն հիմնավորումը, որի հիմքով փոխվել է «Արմենպրեսի» նախկին ղեկավար Տիգրան Հակոբյանի խափանման միջոց կալանքը եւ նա այսօր` մարտի 1-ին, ազատ է արձակվել:
Ըստ այդմ, նշվում է, որ պարզվել է, որ Տ.Հակոբյանը մեղադրվում է ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ առանձնապես խոշոր չափերի` 184.224.060 ՀՀ դրամ հափշտակություն կատարելու համար: Նախաքննության փուլում Տ. Հակոբյանը վերականգնել է «Ագրոհոլդինգ» ՍՊ ընկերությանը պատճառված վնասից 10 մլն. դրամ գումարը եւ պատրաստակամություն հայտնել ազատության մեջ գտնվելու դեպքում շարունակել գումարների վերականգնումը:
«Միաժամանակ նկատի ունենալով, որ Տ.Հակոբյանը վատառողջ է, սրտամկանի կրկնակի ինֆարկտի պատճառով երկու անգամ վիրահատվել է եւ ունի մշտական բուժման եւ բժշկական հսկողության կարիք, բնութագրվում է դրական, ինչպես նաեւ ուսումնասիրելով Տ.Հակոբյանի խափանման միջոցը փոխելու խնդրանքով թվով 24 ԶԼՄ-ների եւ հասարակական կազմակեպությունների ղեկավարների դիմումն ուղղված ՀՀ գլխավոր դատախազին, ՀՀ գլխավոր դատախազության կոռուպցիայի եւ կազմակերպված հանցագործությունների գործերով վարչության պետի տեղակալի 01.03.12թ. որոշմամբ՝ Տ.Հակոբյանը ազատ է արձակվել կալանքից: Նրա նկատմամբ որպես խափանման միջոց է ընտրվել ստորագրություն չհեռանալու մասին»,-ասված է գլխավոր դատախազության մամուլի հաղորդագրության մեջ:
