Արագորեն չորացող Ուրմիա լճի խնդրի հարցում Իրանը կներգրավի նաեւ Հայաստանի օգնությունը, հաղորդում է «Radiozamaneh»-ը:
Իրանի շրջակա միջավայրի պաշտպանության հարցերով կազմակերպության ղեկավար Մոհամադ Ջավադ Մոհամադզադեն օգոստոսի 1 –ին հայտարարել է, որ Իրանն ու Հայաստանը պայմանավորվել են լճի մակարդակի անկման դեմ պայքարի հարցում:
Նա նշել է, որ շոգ եղանակը եւ տեղումների բացակայությունը հանգեցրել է նրան, որ լճի մակարդակն իր պատմության մեջ նվազագույն մակարդակին է հասել:
Ավելի վաղ իրանական իշխանությունները հայտարարել էին Արաքս գետից ջրի փոխանցման մասին Իրանի եւ Ադրբեջանի սահմանային մասում: Սակայն Ադրբեջանը դեմ էր հանդես եկել:
Հայաստանն ու Իրանը վերջերս բնապահպանական ծրագրերի իրականացման համաձայնագիր էին ստորագրել:
Իրանում համոզված են, որ Ուրմիայի չորացումը «ազգային աղետ» կլինի, որը կարող է ոչ բարենպաստ ազդեցություն ունենալ նաեւ հարեւան երկրների վրա: Իրանի պաշտոնատար անձինք հայտնել են, որ 3000 քառ. կմ տարածք չորացել է եւ վերածվել աղի դաշտի:
Իրանցի բնապահպանները զգուշացնում են, որ առանց «ազգային մակարդակով արագ, լուրջ գործողությունների», կարող են աղային փոթորիկներ լինել, որոնք կհասնեն մինչեւ Թեհրանի նահանգ:
