Ֆինանսների նախարարությունը հրաժարվում է մեկնաբանել հարկային բարձրաստիճան պաշտոնյաների մասնակցությամբ «Շարլոտ» գիշերային ակումբում օգոստոսի 27-ի գիշերը տեղի ունեցած ծեծկռտուքի մասին տեղեկատվությունը:
NEWS.am-ի հարցմանը, թե Կենտրոնի հարկայինի պետ Կարեն Կարապետյանն ինչ առնչություն ունի ծեծկռտուքի հետ եւ ինչպես է ֆինանսների նախարարն արձագանքել միջադեպին՝ ֆինանսների նախարարության լրատվական ծառայությունից պատասխանեցին. «Այդ առնչությամբ ՀՀ ոստիկանությունն արդեն իսկ հանդես է եկել համապատասխան տեղեկատվությամբ եւ ձեզ հետաքրքրող հարցերն առաջարկում ենք ուղղել ոստիկանություն»:
NEWS.am-ին հայտնի է դարձել, որ տեղի ունեցած ծեծկռտուքից հետո աշխատանքից ազատվել է հարկային ծառայությունում ԱԱԾ ներկայացուցիչ Արսեն Ղազարյանը: Ըստ շրջանառվող լուրերի՝ նման որոշում կայացրել է ԱԱԾ պետ Գորիկ Հակոբյանը:
Ոստիկանության լրատվական ծառայությունից էլ հայտնեցին, որ գործն այժմ գտնվում է Քննչական գլխավոր վարչության ՀԳ քննության վարչությունում եւ նախաքննությունը շարունակվում է: Այլ մանրամասներ ոստիկանությունը չհայտնեց
Նշենք, որ միջադեպից հետո մարմնական վնասվածքներով «Նաիրի» բժշկական կենտրոն է տեղափոխվել Կենտրոնի հարկայինի պետը: Նրա առողջական վիճակի մասին ոչինչ չի հաղորդվում:
Հիշեցնենք, որ ըստ ոստիկանության՝ դեպքից հետո Արաբկիրի բաժին են բերման ենթարկել 37-ամյա Ռոբերտ Կ.-ն, 37-ամյա Սուրեն Ղ.-ն, 29-ամյա Գարիկ Մ.-ն եւ 35-ամյա Ջանիբեկ Մ.-ն: Ռոբերտ Կ.-ն մարմնին առկա են եղել վնասվածքներ: Պարզվել է, որ ժամը 03.50-ին գիշերային ակումբում, խախտելով հասարակական կարգը, ծեծկռտուք է տեղի ունեցել ակումբի հաճախորդների միջեւ, որի ընթացքում վնասվել է ակումբի սառնարանի ապակյա դուռը: Կատարվում է հետաքննություն:
