Տավուշի մարզի Մովսես գյուղում տեղի ունեցած դանակահարությունը ոչ թե ուսուցչի ու աշակերտի մեջ էր, այլ երիտասարդ համագյուղացիների: NEWS.am-ի թղթակցի հետ զրույցում Մովսեսի գյուղապետ Արարատ Ավալյանը նշեց, որ համագյուղացի երիտասարդներ են՝ 23-25 տարեկան, վիճաբանել են եւ արդյունքը եղել է դանակահարություն: «Աշակերտ չէ, մեր գյուղի բնակիչ է, ջահելներ են երկուսն էլ, կոնկրետ չգիտեմ, թե ինչ է եղել, խոսք խոսքի է հասել, չեն հասկացել իրար, էդպես կռվել են ու դանակահարել են»,-ասաց գյուղապետը: Նա նշեց. որ դեպքի հետ կապված զրուցել է իր ազգականի՝ Արմեն Ավալյանի հետ, բայց ճանաչում է նաեւ Անդրանիկին, ով մի քիչ աշխույժ երիտասարդ է:
Ոստիկանության լրատվական ծառայությունից էլ NEWS.am-ի թղթակցին հայտնեցին, որ ահազանգը ստացել են հոկտեմբերի 16-ին հիվանդանոցից, ըստ որի՝ «ձախ հետույքային» շրջանի վերք ախտորոշմամբ իրենց մոտ է տեղափոխվել 24-ամյա Ա. Ա.-ն: Մեկնած օպերատիվ խումբը պարզել է, որ գյուղամիջում վիճաբանության ժամանակ նշված վնասվածքը կտրող, ծակող գործիքով հասցրել է 23-ամյա Ա.Ա.-ն: Տուժողին տրվել է դատաբժշկի ուղեգիր, դեպքի առթիվ կատարվում է հետաքննություն:
Նշենք, որ «Ժողովուրդ» թերթը գրել է, թե իր տեղեկություններով` Տավուշի մարզի գյուղերից մեկում արտառոց դեպք է տեղի ունեցել: Օրեր առաջ մարզի հիվանդանոց են տեղափոխել մի երիտասարդ տղայի` Անդրանիկ Այդյանին` ձախ հետույքային շրջանի կտրած-ծակած վերք ախտորոշմամբ: Պարզվում է` նրան վնասվածք հասցրել է ուսուցիչ Արմեն Ավալյանը: «Անդրանիկը երկար ժամանակ ապրել է Ռուսաստանի Դաշնությունում եւ օրերս է տեղափոխվել Հայաստան: Նա դասերի ընթացքում ծաղրել է ուսուցչին, եւ վերջինս, այլեւս չդիմանալով տղայի ծաղրուծանակին, դանակով հարվածել է նրա հետույքին: Այդ պահին դասարանում լուրջ իրարանցում է սկսվել, Անդրանիկի համադասարանցիները դուրս են փախել դասասենյակից եւ աղմուկ բարձրացրել: Դպրոցի տնօրինությունը տղային շտապ տեղափոխել է հիվանդանոց: Հետագայում կողմերը հաշտվել են, եւ միջադեպը հարթվել է: Ոստիկանության հասարակայնության հետ կապերի եւ լրատվության վարչությունից հաստատեցին տեղեկությունը»,-գրել է թերթը:
