նախընտրելի դարձնելԳյումրիում այսօր՝ հունվարի 12-ին, դաժանաբար սպանված Ավետիսյանների ընտանիքը սովորություն ուներ գիշերն առանց դարպասը կողպելու քնել: Նույն բակում ապրող՝ Ավետիսյանների բարեկամուհին՝ Կարինե Ավետիսյանը, NEWS.am-ի թղթակցին պատմեց, որ անվտանգության հետ կապված մտահոգություն իրենք երբեւէ չեն ունեցել, թշնամիներ՝ նույնպես, հետեւաբար երբեք չեն մտածել քնելուց առաջ դարպասը կողպելու մասին:
Կարինե Ավետիսյանը պատմեց նաեւ, որ լուսադեմին ձայներ է լսել, բայց մտածել է, որ հրավառություն է կամ երկրաշարժ:
«Առավոտյան ոչ մի տարօրինակ բան չեմ նկատել ու գնացել եմ աշխատանքի, որտեղ էլ իմացել եմ դեպքի մասին ու վերադարձել տուն: Մենք միշտ հանգիստ, դուռն էլ բաց քնել ենք, երբեք չենք մտածել, որ հնարավոր է՝ ինչ-որ բան լինի: Մեր քաղաքի մեջն ենք, ինչ գիտենանք՝ ինչ կարող է լինել, ապահով քնում ենք»,- ասաց Կարինե Ավետիսյանը:
Ավետիսյաններին հարեւանները ճանաչում էին որպես համերաշխ ու հասարակ ընտանիքի, նրանք զարմացած են, թե ինչը կարող էր նման դաժան սպանդի պատճառ դառնալ:
«Թե ինչը կարող էր ստիպել, որ գային, էս ընտանիքին էս ձեւ սպանեին, չեմ կարող ասել: Առավոտ դուրս եկա, տեսա՝ հավաքված են, մտածեցի՝ ինչ-որ մեկը վատացել է, հետո տեսա՝ Հասմիկի քրոջը լացակումած վիճակում: Լաց լինելով ասում էր՝ ոչ էի մտել, ոչ էի տեսել: Հետո կողքից հարեւաններն ասեցին, որ մտել, քրոջ ընտանիքին սպանված է գտել»,- NEWS.am-ի հետ զրույցում ասաց հարեւաններից Միշա Ալեքսանյանը:
Գյումրեցիները ողբերգական դեպքը նմանեցնում են 16 տարի առաջ Գյումրիի կենտրոնական շուկայում տեղի ունեցածին, երբ ալկոհոլի ազդեցության տակ 2 ռուս զինծառայողներ կրակ էին արձակել քաղաքացիների վրա, ինչի հետեւանքով զոհվել էր 7 մարդ:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների 7 հոգանոց ընտանիքի 6 անդամներին։ Սպանվածներից հինգը չափահաս են եղել, մեկը՝ մանկահասակ երեխա: Վեց ամսական մյուս երեխան տեղափոխվել է հիվանդանոց, որտեղ վիրահատվել է եւ այժմ ծանր վիճակում գտնվում է վերակենդանացման բաժանմունքում։ Սպանության հիմնական կասկածյալը ռուս զինվորական Վալերի Պավելի Պերմյակովն է: Ոստիկանությունը որոնում է նրան:
