Ամերիկուհին մեկուկես տարվա ընթացքում 1.4 մլն դոլար է փոխանցել առցանց-սիրեցյալին, որին իրական կյանքում երբեք չի տեսել: Ըստ Viral Spell-ի, Աֆրիկայում գտնվող տղամարդը 46-ամյա կնոջը համոզել է փոխանցումներ կատարել՝ նրան պարբերաբար սեր խոստովանելով: Նա նաեւ խոստացել է առաջիկայում ԱՄՆ ուղեւորվել եւ ամուսնանալ նրա հետ:
Երկու անգամ ամուսնալուծված Սառային (ազգանունը չի նշվում) հրավիրել են մասնակցելու Dr. Phill հեռուստաշոուին: Նա ասել է, որ նախկինի պես հավատում է այն տղամարդուն, որին ճանաչում է Քրիս Օլսեն անունով: Ամերիկուհու խոսքով, ինքը «95%-ով վստահ է Օլսենի զգացմունքների հարցում»:
Նրա խոսքով, տղամարդը վերջին մեկուկես տարվա ընթացքում ապրում է Աֆրիկայում (մե՛կ Բենինում, մե՛կ Նիգերիայում), իտալական արմատներ ունի, սակայն ԱՄՆ քաղաքացի է: Նա չի կարողանում տուն վերադառնալ, քանի որ անընդհատ որեւէ բան խոչընդոտում է. բանկային քարտի կորուստը, տեղի իրավապահների կողմից անարդարացի մեղադրանքները եւ այլն: Նրանք երբեք չեն հանդիպել, սակայն կանոնավոր կերպով խոսում են հեռախոսով եւ նամակներ են գրում միմյանց:
Օլսենին օգնելու համար առցանց-հարսնացուն այս ընթացքում նրան է ուղարկել իր բոլոր խնայողությունները, իսկ հետո վաճառել է 500 հազար դոլար արժողությամբ անշարժ գույքը:
Օլսենի իրական էությունն ամերիկուհու աչքերում բացահայտելու՝ հարազատների ջանքերն ապարդյուն են եղել: