Երեւանի Կիեւյան կամրջից երեկ՝ օգոստոսի 3-ին, կինը փորձել է ցած նետվել սոցիալական եւ անձնական խնդիրների պատճառով: NEWS.am-ի տեղեկություններով՝ կինը իր տունը տվել էր վարձով: Վարձակալն էլ իր հերթին էր այն տվել վարձով, եւ ահա բնականարում ապրողները, ովքեր պարտքեր ունեին, վաճառել էին իրերը, այդ թվում՝ տան տիրոջ իրերը, օրինակ՝ արդուկ, գորգ, գազօջախ: Երբ այս ամենը ի հայտ է եկել, կինը բողոքել է իրավապահներին, քրեական գործ է հարուցվել, սակայն կնոջ ամուսինը հայտնել է, որ ինքը տեղյակ է եղել, որ իրերը վաճառել են, ու այդպես գործը կարճվել է: Այժմ նրանք ամուսնալուծված են, կինն էլ բողոքում է գործը կարճելու դեմ:
Ավելի վաղ NEWS.am-ը հայտնել էր, որ Երեւանի Կիեւյան կամրջից մոտ 30 տարեկան մի կին սպառնում է ցած նետվել: Կինն անցել է կամրջի ցանկապատից այն կողմ, նա հայտարարում է, որ «ոստիկաններն իր փողերը կերել են» եւ պահանջում է հանդիպում ՀՀ ոստիկանապետ Վլադիմիր Գասպարյանի հետ: Կինն իր հետ բերել է երկու մանկահասակ երեխաներին: Դեպքի վայրում են փրկարարները, ոստիկաններ, «Շտապօգնության» ծառայությունը:
Ոստիկանները կնոջը փորձում են համոզել, որ հրաժարվի իր մտադրությունից: Դեպքի վայր է ժամանել Երեւանի ոստիկանապետ Աշոտ Կարապետյանը, երկարատեւ բանակցությունների արդյունքում հաջողվել է կնոջը ետ պահել ինքնասպանություն գործելու մտքից: