Ադրբեջանի կառավարությունը շարունակում է փչացնել Արեւմուտքում իր կերպարը` ազատ չարձակելով քաղբանտարկյալներին: Մի օր Ադրբեջանը կբախվի այդ քաղաքականության հետեւանքներին: Այդ մասին «Ամերիկայի ձայնին» տված հարցազրույցում ասել է Մարդու իրավունքների եւ ժողովրդավարության Մակքեյնի ինստիտուտի տնօրեն Դեւիդ Կրամերը, տեղեկացնում է haqqin.az-ը:

«Ադրբեջանի կառավարությունը շանս ուներ ճիշտ քայլ ձեռնարկելու` ազատելով քաղբանտարկյալներին: Սակայն բաց թողեց այդ հնարավորությունը: Փոխարենը, քաղբանտարկյալներին ազատելուց հրաժարմանը զուգահեռ ազատազրկման է դատապարտվել եւս մեկ լրագրող  (Ռաուֆ Միրկադիրովը): Այսպիսով` իրավիճակը գնալով վատանում է», - ասել է Կրամերը:

Քաղբանտարկյալներին ազատելուց հրաժարումը Կոնգրեսում միայն կավելացնի Քրիստոֆեր Սմիթի ակտի կողմնակիցների թիվը, կարծում է Կրամերը: 

Նրա խոսքով, դիվանագիտությունը, հանրային քաղաքականության հնարավորությունները ցանկալի արդյունքների չեն հանգեցրել, եւ այս իրավիճակում այլ ելք չի մնում, քան պատժամիջոցների դիմելը: 

Ինչ վերաբերում է պատժամիջոցների ժամանակավոր շրջանակին, ապա Ռուսաստանի նկատմամբ Մագնիտսկու համանման ակտի քննարկումը սկսվել էր  2010-ին, բայց ընդունվել էր 2,5 տարի անց` 2012-ի վերջին:

Կրամերի կարծիքով, Ադրբեջանին վերաբերող հարցում իրավիճակն առայժմ այն փուլում է, որում  2010-ին Մագնիտսկու ակտն էր:

Կրամերի խոսքով, եթե քաղբանտարկյալներն ազատ արձակվեն, Սմիթի օրինագիծը կհանվի օրակարգից: