Գեղարքունիքի մարզի բնակիչներն այսօր՝ մայիսի 28-ին, վաղ առավոտյան փակել էին Մարտունի- Վարդենիս ավտոճանապարհը՝ բողոքելով ճանապարհի անմխիթար վիճակից։
Կարեւոր նշանակություն ունեցող այս ճանապարհն արդեն մի քանի տարի է՝ այս վիճակում է։ Նախորդ տարիներին սպասարկող կազմակերպությունը տեղումներից հետո մշակում էր այն եւ հնարավորինս անցանելի դարձնում։ Այս տարվա հորդառատ անձրեւներից հետո ճանապարհը սարսափելի վիճակում էր։
Այդ պատճառով հարակից գյուղերի բնակիչներն այսօր փակել էին ճանապարհը։ Նրանց հետ հանդիպել են Գեղարքունիքի մարզպետարանի աշխատակիցներն ու համոզել բացել ճանապարհը։
«Ճանապարհը հիմա բաց է։ Այս ճանապարհի վերանորոգման աշխատանքների համար արդեն հունիսի 27-ին մրցույթ է հայտարարված։ Այս հարցը մշտապես եղել է Հանրապետության նախագահի ուշադրության կենտրոնում, իսկ մրցույթի պատվիրատուն Տրանսպորտի եւ կապի նախարարությունն»,- NEWS.am-ի թղթակցին ասաց Գեղարքունիքի մարզպետ Ռաֆիկ Գրիգորյանը։
Հիշեցնենք, որ նախօրեին ՀՀ տրանսպորտի եւ կապի նախարարության «Տրանսպորտի ԾԻԳ» պետական հիմնարկի տնօրեն Էմիլ Սարգսյանը, անդրադառնալով հասարակության մեջ առկա դժգոհությանը, թե անմխիթար վիճակում են մի շարք ռազմավարական նշանակության ճանապարհներ, ինչը ցայտուն երեւաց ապրիլյան պատերազմի օրերին, հայտարարել էր, թե Մարտունի - Վարդենիս - Սոթք - ԼՂՀ սահման մայրուղու ընդամենը 5 կմ ճանապարհահատվածն է անմխիթար վիճակում: