Ռուսաստանում՝ մերձմոսկովյան Սոլնեչկոգորսկում հրհեդվող մեքենայի մեջ գտնվող 5-ամյա Անդրեի կյանքը փրկած՝ տաքսու հայ վարորդը երեխային արդեն իր 3-րդ որդին է համարում: 38-ամյա Արա Ջանասլանյանը որոշել է առաջիկայում իր երկու որդիների հետ անպայման այցելել ռուս փոքրիկին:
«Ինքն արդեն իմ 3-րդ որդին ա: Ես մինչեւ չգնամ, իմ աչքով չտեսնեմ երեխային, հանգիստ չեմ լինի: Ամեն օր էդ տեսարանը իմ աչքի առաջ է, տաքսի եմ վարում, էդ ա գալիս, երազումս եմ տեսնում: Հիվանդանոցում էլ համարս գրեցի, տվեցի ծնողներին, ասեցի՝ մենակ զանգեք, իմանամ՝ երեխեն ոնց է, ինձ էլ ուրիշ բան պետք չէ»,- NEWS.am-ի հետ զրույցում ասաց Արան:
Արան պատմում է, որ եթե կես րոպե էլ ուշանար, երեխային այլեւս հնարավոր չէր լինի դուրս բերել մեքենայից: Երբ ինքը դեպքի վայրում է հայտնվել, մեքենան արդեն հրդեհվելիս է եղել, մեքնայի շուրջբոլորը հավաքված մարդիկ էլ բղավելիս են եղել, որ ներսում երեխա կա ու մեքենան շուտով կպայթի:
«Ես տեսա ու լրիվ շոկի մեջ ընկա: Դիմացի դուռը արագ բացեցի, նստատեղերը ստուգեցի, ոչ մեկի չգտա: Ու դուռը բացելու հետեւանքով մեքենան սկսեց բոցով վառվել, ես էլ բան չէի տեսնում: Հետեւի դուռը բացեցի, հետեւի նստատեղերը շոշոփեցի, վառվում էին, կրակի մեջ էին, մարդ չկար: Հետո նստատեղի հետեւը շոշափեցի, հասկացա, որ մի բան կա: Հանեցի, տեսա՝ երեխան ա: Հազաց, սկսեց լացել, պառկացրինք, հետո ես էլ չսպասեցի, որ «Շտապօգնություն» գա, ես իմ մեքենան նստեցրի երեխային, որ շուտ հիվանդանոց հասցնեմ, էդ ժամանակ ծնողներն էլ իջան»,- NEWS.am-ին պատմեց Արա Ջանասլանյանը:
Արան պատմում է՝ մի վայրկյան էլ չի երկմտել՝ մոտենալ մեքենային, թե ոչ, երբ լսել է, որ ներսում երեխա կա. «15-20 հոգի կանգնած նայում են: Ասեցի՝ ո՞նց՝ երեխու ձայն ա գալիս, կանգնած նայո՞ւմ եք: Բա երեխեն ավտոյի մեջ վառվի, մի հատ ձեռք չգցե՞ն: Իմ աչքին էլ ոչ մի բան չէր գալիս, մենակ երեխային փրկելը: Հայ տղամարդը չի կարա նման բաների կողքով անտարբեր անցնի: Եթե դու շալվար ես հագել, ուրեմն պարտավոր ես կյանքդ էլ վտանգել: Եթե ես չկարանայի երեխուն հանեի, չէի ների ամբողջ կյանքում ինձ»:
Արա Ջանասլանյանը ծնունդով Արարատի մարզի Արմաշ գյուղից է: Արդեն 16 տարի է՝ ապրում է Սոլնեչկոգորսկում: Երկու որդի ունի 5 եւ 8 տարեկան, որոնց ինքն է խնամում ամուսնալուծությունից հետո: 2 երեխաների հայրն առաջին դեպքը չի, որ օգնության է հասնում պատահական, անծանոթ մարդկանց:
«Մի անգամ էլ մի աղջիկ ընկավ գետնին ստամոքսի ցավից: Օգնեցի, տարա տուն, վերջում ծնողները գոռգոռացին վրաս, թե ինչ գործ ունես մեր աղջկա հետ: Դրանից հետո որոշել էի էլ ոչ մեկի չօգնել, բայց դե չի ստացվում: Ես անտարբեր չեմ կարողանում անցնեմ: Եթե փողոցում մեկին տեսնեմ ընկած, չեմ կարում չօգնեմ, խանութում սդաչին չեմ վերցնում, որ մի տեղ եմ գնում, տեսնում եմ՝ ավտո ա փչացած, օգնում են, պետք ա՝ ձրի 15-20 կմ տանում, տեղ եմ հասցնում: Էդ սաղ հանուն իմ երեխեքի եմ անում: Աստված միշտ դեմդ ա բերում, որ մի օր հանկարծ ինձ մի բան լինի, երեխեքիս մի կտոր հաց տվող լինի»,- ասաց Արա Ջանասլանյանը:
5-ամյա Անդրեյի մոտ 1-ին ու 2-րդ աստիճանի այրվածքներ են ախտորոշել: Նրա կյանքին վտանգ չի սպառնում: