Երեւանի ավագանու «Բարեւ Երեւան» խմբակցության ղեկավար Անահիտ Բախշյանն, այսօր՝ սեպտեմբերի 20-ին, առաջին դասարանցիների՝ մաթեմատիկայի գիրք-տետրերով ապահովված չլինելու խնդրով ծնողների ահազանգի հիման վրա նամակ-հարցում է ուղարկել ՀՀ ԿԳ նախարար Արմեն Աշոտյանին:

Նամակում ասված է.

«Ծնողներն  ահազանգում են այն մասին, որ առաջին դասարանում սովորող իրենց  երեխաների դասարանում ոչ բոլորն են ապահովվել  մաթեմատիկայի նոր գիրք-տետրերով, այլ երեխաներին տրվել են անցյալ տարվա արդեն  օգտագործված գիրք-տետրերը, որոնց վրա գրված է՝ վերադարձման ենթական չէ: Ծնողներին խորհուրդ է տրվել  կամ օգտագործված գրքերում գրվածները ջնջել, կամ գրախանութներից  1500 դրամով  գնել նորն  այն դեպքում, երբ  պետությունը տարրական դպրոցի դասագրքերը տրամադրում է  անվճար: Ի դեպ «Facebook» սոցիալական ցանցով այս մասին գրել են նաեւ Ձեզ:

Պարզվեց, որ այս անթույլատրելի երեւույթը համատարած է: Ո՞վ  է համարձակվել խեղաթյուրել պետության այս պարտականությունը եւ ծնողին առաջարկել դասագիրքը գրախանութից   գնել այն դեպքում, երբ հրատարակիչներն ու տպարանները  իրավունք չունեն տարվա այս ժամանակահատվածում վաճառքի հանել  դասագրքերը: Նրանք դասագրքերն իրավունք ունեն վաճառելու միայն հոկտեմբերին, երբ դպրոցներում դրանց բաշխումն արդեն  համարվում է ավարտված եւ վաճառքի հանված դասագրքերի շապիկը պետք է տարբեր լինի դպրոցին տրամադրվածից:

Խնդրում եմ պարզաբանել, թե.

1. պետբյուջեից  հատկացվե՞լ  է   արդյոք տարրական դասարանների դասագրքերի  տպագրման համար նախատեսված  գումարը եւ որքա՞ն,

2. տպագրված դասագրքերի քանակը համապատասխանո՞ւմ է արդյոք   դպրոցներից ստացված պատվերների   քանակին,

3. մասնավորապես,  առաջին դասարանի մաթեմատիկայի  քանի՞ դասագիրք է տպագրվել   եւ   ինչո՞ւ  դպրոցներում առաջին դասարանցիներն ապահովված չեն  հատկապես մաթեմատիկայի դասագրքերով,

4. ընդհանրապես դպրոցներում   աշակերտներն  ապահովվա՞ծ  են  դասագրքերով:

Շնորհակալություն համագործակցության համար»: