նախընտրելի դարձնել
Գյումրիի նախկին քաղաքապետ Վարդան Ղուկասյանի դստեր փեսացուի սպանության գործով ամբաստանյալ Հարություն Սարգսյանի դեմ ՀՀ ոստիկանության Շիրակի մարզային վարչության պետ Կարեն Բաբակեխյանը դեռ բողոք չի ներկայացրել: Այս մասին NEWS.am-ի թղթակցի հետ զրույցում ասաց ինքը՝ Կարեն Բաբակեխյանը:
Նրա խոսքով՝ սակայն, դա չի նշանակում, որ չի ներկայացնելու նման բողոք: «Ամենայն հավանականությամբ, կներկայացնեմ: Ես հիմա արձակուրդի մեջ եմ հանգստանամ առաջիկայում կորոշեմ»,- ավելացրեց Կարեն Բաբակեխյանը:
Ավելի վաղ տեղեկացրել էինք, որ Գյումրիի նախկին քաղաքապետ Վարդան Ղուկասյանի դստեր փեսացուի սպանության գործով ամբաստանյալ Հարություն Սարգսյանի դեմ եւս մեկ քրեական գործ կհարուցվի: Այս մասին NEWS.am-ի թղթակցի հետ զրույցում ասել էր ոստիկանության Շիրակի մարզային վարչության պետ Կարեն Բաբակեխյանը՝ արձագանքելով Հարություն Սարգսյանի այն մեղադրանքներին, թե նա ծեծելով է նրանից ցուցմունքներ կորզել: «Դա բացարձակ անհեթեթություն է եւ զրպարտություն»,- նշել էր Կարեն Բաբակեխյանը եւ ավելացրեց, որ Հարությունյանի վրա քրեական գործ կա հարուցված, սակայն ինքը այդ զրպարտության համար հետեւողական է լինելու եւ պահանջելու է, որ նրա դեմ եւս մեկ քրեական գործ հարուցվի: «Իհարկե պետք է պահանջեմ, որ պատասխան տա անհեթեթ մեղադրանքի համար: Մեկ քրեական գործ կա, բայց մեկն էլ կավելանա իր վրա»,- ավելացրեց Կարեն Բաբակեխյանը:
Հիշեցնենք, որ Շիրակի մարզի ընդհանուր իրավասության դատարանում նոյեմբերի 27-ին ցուցմունք է տվել ամբաստանյալ Հարություն Սարգսյանը, ով մեղադրվում է Գյումրիի նախկին քաղաքապետ Վարդան Ղուկասյանի դստեր նշանածի՝ Կարեն Եսայանի, սպանության մեջ: ԳԱԼԱ-ի փոխանցմամբ, նա կարդացել է իր ցուցմունքը, որ նախօրոք շարադրել էր թղթի վրա եւ ասել, որ ծեծի է ենթարկվել, թե ոստիկանության Շիրակի մարզային վարչության պետ Կարեն Բաբակեխյանի, թե նախկինում քրեական հետախուզության պետ ներկայիս ոստիկանապետ Աշոտ Կարապետյանի կողմից:
