Եվրասիական տնտեսական միության շրջանակում արդեն ստեղծվում է Առեւտրի համաշխարհային կազմակերպության (ԱՀԿ) հետ Հայաստանի փոխգործակցության հարցերի աշխատանքային խումբը: Այս մասին NEWS.am-ի թղթակցի հետ զրույցում հայտարարեց Հայաստանի ֆինանսների փոխնախարար Սուրեն Կարայանը:
Նա նաեւ հավելեց, որ հանձնաժողովի կազմում ընդգրկվելու են ԵՏՄ անդամ երկրների տնտեսական քաղաքականությունը որոշող նախարարությունների՝ Հայաստանի էկոնոմիկայի նախարարության, Ռուսաստանի տնտեսական զարգացման նախարարության եւ Բելառուսի եւ Ղազախստանի համապատասխան գերատեսչությունների ներկայացուցիչներ:
«Աշխատանքային խմբի ձեւավորման գործընթացն արդեն սկսվել է: Այն քննարկելու է ԱՀԿ-ի հետ Հայաստանի փոխգործակցությունը՝ ԵՏՄ-ին անդամակցության լույսի ներքո»,- նշեց Կարայանը:
Նշենք, որ ԵՏՄ-ին անդամակցությունից եւ մաքսատուրքերի փոփոխությունից հետո Հայաստանը պետք է բանակցություններ վարի ԱՀԿ-ի այն երկրների հետ, որոնք կհայտարարեն մեր երկրի հետ առեւտրում իրենց շահերի խախտման մասին: