Առայժմ հայտնի չէ, թե ԱԺ ԲՀԿ-ական պատգամավոր Մելիք Մանուկյանի՝ Շշի Մելոյի որ եղբայրն է առաջադրվելու Աբովյանի քաղաքապետի ընտրություններին: «Թող ժամանակ գա, նոր կխոսենք, կառաջադրվի, կիմանաք, չառաջադրվի, էլի կիմանաք»,- NEWS.am-ի թղթակցի հետ զրույցում ասաց Մելիք Մանուկյանը:
Դիտարկմանը, թե եթե երկու եղբայրն էլ առաջադրվեն, ինչ պետք է անեք, ում սատարեք, պատգամավորն ասաց, որ «այդպես չի լինում, որ երկու եղբայր առաջադրվեն, մի եղբայրն էլ մնա շիվար՝ ում սատարի»:
Մելիք Մանուկյանից տեղեկացանք նաեւ, որ ի տարբերություն իրեն՝ եղբայրները անկուսակցական են:
Նշենք, որ Աբովյանի քաղաքապետ Կարապետ Գուլոյանին նշանակել են Կոտայքի մարզպետ, այժմ այդտեղ արտահերթ ընտրություն պետք է լինի: Հավանական թեկնածուներն են համարվում Ծառուկյանի օգնական Վահագն Գեւորգյանը, նրա սանիկ Արթուր Հարությունյանը՝ Պալաչը, նախկին քաղաքապետ Կարո Իսրայելյանը, Մելիք Մանուկյանի եղբայրները: Պատգամավորը, ավելի վաղ մեզ հետ զրույցում անդրադառնալով իր եղբոր՝ Վարդան Մանուկյանի հնարավոր առաջադրման մասին լուրին, ասել էր հետեւյալը. «Բայց ինչի՞ ես կասկածում, որ հնարավոր չէ, ի՞նչ է՝ թոփա՞լ է, քո՞ռ է, հիվա՞նդ է, ի՞նչ է եղել, որ չառաջադրվի»: Լրատվամիջոցներում տեղեկություններ կային, որ Շշի Մելոյի մյուս եղբայրը՝ Ռուբեն Մանուկյանը, եւս հնարավոր է առաջադրվի ընտրություններին:
