Մերի Մարգարյանի եւ նորածնի մահվան գործը դատարան է ուղարկվել դեռեւս մայիսի 16-ին, սակայն առ այսօր դատավոր Դավիթ Բալայանն այն վարույթ չի ընդունում:
Մեկ ամսից ավելի է` դատավորն ու դատախազը տուն-տունիկ են խաղում: Դատավոր Բալայանը չորս անգամ գործը հետ է ուղարկել դատախազ Ալիկ Աբրահամյանին, որի հոր հետ ըստ մամուլի հրապարակումների կոնֆլիկտ ունի: Դատախազն էլ իր հերթին ամեն անգամ սահմանված ժամկետում ուղղված տարբերակն ուղարկում է դատարանին, սակայն դատարանն այդպես էլ վարույթ չի ընդունում:
Տպավորություն է, որ դատավորն ու դատախազը «մոռացել» են իրենց պարտականությունների մասին եւ առաջնորդվում են միայն ամբիցիաներով: Նշենք, որ գործում առկա են տեխնիկական վիպակներ, այն էլ կապված վկաներից մի քանիսի բնակության հաշվառման եւ փաստացի բնակվելու վայրերի հետ: Վստահաբար, վրիպակները դատախազը կարող է շտկել մի քանի ժամում եւ գործն ուղարկել դատարան, սակայն թե ինչու այդպես չի վարվում, պարզ չէ: Ըստ երեւույթին, եւ դատավորը, եւ դատախազը չեն կարողանում մոռանալ իրենց կոնֆլիկտի մասին:
Ըստ մեղադրական եզրակացության՝ «Շենգավիթ» ԲԿ-ի մանկաբարձ-գինեկոլոգ Շուշանիկ Բախշյանը 2015թ. փետրվարի 11-ից հաշվառման է վերցրել եւ վարել Մերի Վաղինակի Մարգարյանի հղիությունը: Բախշյանը, պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի եւ այլ հանգամանքների առկայությունից, ինչպես նաեւ ապահովել ցուցաբերվող բժշկական օգնության եւ սպասարկման քանակական եւ որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, ինչն անզգուշությամբ առաջացրել է Մերի Մարգարյանի, այնուհետեւ` նորածնի մահը:
Նույն բժշկական կենտրոնի բժշկուհի Անի Բաբելյանը 2015թ. հուլիսի 25-ին բժշկական օգնությունը եւ սպասարկումը կազմակերպելու ժամանակ, իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, որն անզգուշությամբ առաջացրել է Մերի Մարգարյանի, այնուհետեւ` նորածնի մահը:
Բախշյանին եւ Բաբելյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Բախշյանը գրավի դիմաց ազատ է արձակվել, իսկ Բաբելյանին նկատմամբ խափանման միջոց է ընտրվել ստորագրություն չհեռանալու մասին:
