Արցախի զորամասերից մեկում պայմանագրային զինծառայող է զոհվել: Քննչական կոմիտեի տեղեկացմամբ՝ 26-ամյա Գոռ Ֆրունզիկի Խուդինյանը զոհվել է հակառակորդի կրակը ճնշելու նպատակով գնդացրով պատասխան կրակ վարելու ժամանակ: Նախնական տվյալներով՝ փամփուշտը պայթել է փողում եւ մահացու բեկորային վիրավորում հասցրել Խուդինյանին: Գոռ Խուդինյանը Վանաձորից է: Ամուսնացած էր, մանկահասակ երեխա ունի:
Իսկ գիշերը հրադադարի ռեժիմն ակտիվորեն խախտած ադրբեջանական կողմը հայ դիրքապահների ուղղությամբ ավելի քան 1600 կրակոց է արձակել: Հայկական կողմի պատասխան գործողությունների արդյունքում հակառակորդն առնվազն մեկ զոհ ունի:
Ալեքսանդր Լապշինի արտահանձնումից ոգեւորված Բաքուն ավելի առաջ է գնացել եւ հիմա էլ Ինտերպոլի միջազգային հետախուզում է հայտարարել Եվրախորհրդարանի երեք պատգամավորների նկատմամբ: Լյուքսեմբուրգից Ֆրանկ Էնգելը, Չեխիայից Յարոմիր Շտետինան եւ Կիպրոսից Էլենի Թեոխարուսը նույն «հանցանքն» են գործել. առանց Բաքվի համաձայնության Լեռնային Ղարաբաղ են այցելել՝ հանրաքվեն դիտարկելու համար:
Հայաստանի ոստիկանությունը, սակայն, հայտնել է, որ նշված տվյալներով անձինք Ինտերպոլի միջոցով չեն հետախուզվում: Իսկ պաշտոնական Երեւանը Բաքվի հայտարարությանն արձագանքել է՝ նշելով, որ Ադրբեջանի իշխանություններն ամեն ինչ զավեշտի են վերածում՝ թե՛ միջազգային իրավունքը, թե՛ նույնիսկ իրենց ներքին կյանքը:
Հայաստանում Չեխիայի դեսպանն էլ հայտարարել է, որ Պրահան չի պատրաստվում արտահանձնել իր քաղաքացիներին, իսկ Եվրախորհրդարանի ներկայացուցիչներն ընդհանրապես պատգամավորական անձեռնմխելիություն ունեն:
Ղազախստանի մահմեդականներն էլ ծաղրում են Իլհամ Ալիեւին՝ կնոջն Ադրբեջանի առաջին փոխնախագահ նշանակելու առիթով: Նրանք Ադրբեջանի նախագահին առաջարկել են երկրի պաշտպանության նախարար էլ իր զոքանչին նշանակել: Բացի այդ, Ղազախստանի մահմեդականները պատրաստակամություն են հայտնել Ալիեւին օգնել հուսալի կադրերի ընտրության հարցում: Առաջարկել են նրան երեք նոր կին նվիրել, որոնց նույնպես կկարողանա պետության մեջ պատասխանատու պաշտոններ վստահել. «որպես իսկական մահմեդական»՝ Ալիեւը չորս կին ունենալու լիարժեք իրավունք ունի:
Պաշտպանության նախարարությունը շփման գծում լարվածության աճ է արձանագրում, բայց, Վիգեն Սարգսյանն ընդգծում է, օգտագործվող զինատեսակների առումով: Այս գիշեր, օրինակ, ականանետեր եւ թեթեւ հրետանի է կիրառվել: Հայկական կողմը պարզապես պետք է միշտ զգոն լինի:
Նախարարը գոհ է նաեւ «1000 դրամների» օրենքից: Վիգեն Սարգսյանը հիշեցրել է, որ օրենքը տարածվում է այս տարեսկզբից միջադեպերի հետեւանքով զոհված եւ հաշմանդամություն ստացած զինծառայողներին եւ նրանց ընտանիքներին: Բայց կարող է քննարկվել նաեւ այլ դեպքերի վրա նույնպես օրենքը տարածելու հարցը:
Մամուլում հրապարակումներ կան, որ նախկին նախարար Սեյրան Օհանյանի նկատմամբ չարաշահումների համար քրեական գործ կարող են հարուցել: Վիգեն Սարգսյանը խուսափում է այս պահին մեկնաբանել, արդյո՞ք գործ հարուցելու հիմք կա: Բայց քայլ առ քայլ, հետեւողականորեն լուծում են խնդիրները, եւ հանրային միջոցների օգտագործման արդյունավետության մասին անպայման կխոսեն:
Ինչ վերաբերում է խորհրդարանական ընտրություններում ՀՀԿ-ի համապետական ընտրացուցակը գլխավորելու եւ պաշտպանության նախարարի պաշտոնի համատեղելիությանը. Վիգեն Սարգսյանը համոզված է, որ կկարողանա համատեղել աշխատանքն ու նախընտրական քարոզչությունը: Բայց բանակում կուսակցական գործունեությունը բացառում է:
ՀՀԿ-ի նախընտրական քարոզչությանը չի մասնակցելու նորաթուխ հանրապետական Վարդան Արամյանը: Ասում է՝ իրեն չեն հանձնարարել քարոզել, հանձնարարել են աշխատել:
Սուրեն Կարայանը նույնպես նախընտրական գործընթացներին չի մասնակցում, հօգուտ երկրի է աշխատում: Նախարարը նաեւ վստահեցնում է, որ նախընտրական քարոզչությունը չի խանգարում Հայաստանի տնտեսությունում ներդրումներ անողներին:
Ներդրումների հարցը եղել է նաեւ աշխատանքային այցով Վրաստանում գտնվող վարչապետ Կարեն Կարապետյանի հանդիպումների օրակարգում: Վրաստանի գործընկերոջ հետ զրույցում քննարկել են տարածաշրջանային համագործակցությունը խորաացնելու, առեւտրաշրջանառությունն ակտիվացնելու եւ առկա ամբողջ ներուժն օգտագործելու հարցերը:
Պաշտպանության նախարարության տարածքում արտակարգ դեպք է տեղի ունեցել: Կեսգիշերն անց Երեւանի բնակիչ Եփրեմյանն անսթափ վիճակում իր «Օպել» մակնիշի մեքենայով նախարարության մուտքի դարպասներին է հարվածել եւ տարածք ներխուժել: Հսկիչ անցակետի հերթապահն իրեն ամրակցված ատրճանակից ութ կրակոց է արձակել ավտոմեքենայի ուղղությամբ: Եփրեմյանը չի տուժել: Նա ձերբակալված է:
Պոլսո հայոց պատրիարքական ընդհանուր փոխանորդ Արամ արքեպիսկոպոս Աթեշյանն ու պատրիարքարանի հոգեւոր խորհրդի առաջնորդ Սահակ եպիսկոպոս Մաշալյանը Ամենայն Հայոց Կաթողիկոսի հրավերով Հայաստան են եկել: Նրանք Էջմիածնում այսօր մասնակցել են Վարդանանց տոնին նվիրված պատարագին, բայց Հայաստան այցի պատճառը վերջին օրերին Պոլսո Հայոց պատրիարքի ընտրության հետ կապված ճգնաժամն է:
Եպիսկոպոս Մաշալյանը հայտարարել էր, որ Արամ արքեպիսկոպոսի պահվածքի պատճառով հրաժարական է տալիս՝ պնդելով, որ նա ամեն կերպ խոչընդոտում է պատրիարքի ընտրությունների կազմակերպմանը: Այնուհետ ստամբուլահայ համայնքի ազդեցիկ ներկայացուցիչները հավաքվել ու Աթեշյանի եւ Մաշալյանի ստորագրությամբ արձանագրություն են կազմել, ըստ որի՝ պատրիարքի ընտրությունները տեղի են ունենալու մայիսի 28-ին, ընտրվելու է տեղապահ, իսկ Արամ արքեպիսկոպոսը չի խառնվելու ընտրական գործընթացին։ Այս որոշմանն էլ դեմ է դուրս եկել ստամբուլահայերի մի մասը: Արդյունքում Գարեգին երկրորդը ճգնաժամը հաղթահարելու համար բարձրաստիճան հոգեւորականներին Էջմիածին է հրավիրել:
NASA-ի գիտնականները պատմական բացահայտում են արել. TRAPPIST-1 աստղի մոտ յոթ մոլորակ է հայտնաբերվել, որոնցից երեքը բնակելի գոտում են եւ կարող են ջուր ունենալ:
Շուրջ երկու տասնամյակ անց, թերեւս, հնարավոր կլինի պատասխանել շատերին հետաքրքրող հարցին. արդյո՞ք մենակ ենք Տիեզերքում: TRAPPIST-1 աստղը գտնվում է Երկրից 40 լուսային տարվա հեռավորությամբ՝ Ջրհոսի համաստեղությունում: Հայտնաբերված մոլորակներից 6-ը չափավոր կլիմայի գոտում են, որտեղ ջերմաստիճանը Ցելսիուսի 0-ից 100 աստիճանի միջակայքում է: Դրանցից առնվազն 3-ում ջուր կա: Մեզ հայտնի աստղային համակարգերից ոչ մեկն այսքան համադրելի չէ Երկրի չափերին: Մոլորակային համակարգը մոտավորապես 1.5 մլրդ տարեկան է:
Տեւական վերելքից հետո դոլարի փոխարժեքը փոքր-ինչ նվազել է, իսկ եվրոն թանկացել է: Արդյունքում դոլարի փոխարժեքն այսօր կազմել է 486 դրամ, եվրոյինը՝ 513, ռուբլունը՝ 8 դրամ 40 լումա, ֆունտինը՝ 607 դրամ:
«Հայպետհիդրոմետ»-ի կանխատեսումներում արդեն «պլյուս» նշանն է հայտնվում: Երեւանում փետրվարի 24-ին առանց տեղումների եղանակ կլինի: Գիշերը կդիտվի -8-10 աստիճան ցուրտ, իսկ ցերեկը՝ +2+4 աստիճան տաքություն: Հանրապետության տարածքում, ընդհանուր առմամբ, վաղը տեղումներ չեն սպասվում: