ԵՄ-ն արմատական կառուցվածքային փոփոխությունների կարիք ունի, քանի որ եվրոպական միասնությանը սպառնում են օրեցօր պոպուլյար դարձող աջ պոպուլիստական շարժումները, նաեւ որոշ անդամ երկրների նկրտումները, գրում է Die Presse պարբերականը։
Բրյուսելը պատրաստ չէ բարեփոխումներ իրականացնելուն, բոլոր հարցերը լուծում է «հին գվարդիան», իսկ նոր սերունդը ձայնի իրավունք չունի, նշում է հոդվածագիրը։ Սակայն, չնայած ԵՄ «թուլակամ ղեկավարության» հասցեին հնչող քննադատոթյուններին՝ իրական խնդիրն ուրիշ տեղ է թաքնված՝ ԵՄ անդամ երկրներում։
«ԵՄ-ի դեպքում ձուկը ոչ թե գլխից է որդնում, ինչպես ժողովրդական ասացվածքում, այլ որոշ եվրոպական մայրաքաղաքներից»,- ասվում է հոդվածում
ԵՄ միասնությունը, ըստ հոդվածագրի, վտանգված է մասնավորապես Հունգարիայի ու Լեհաստանի պատճառով։
«Եթե Վիկտոր Օրբանը պնդում է , որ իր երկիրը ԵՄ կողմից հարձակումների է ենթարկվում, իսկ Լեհաստանն էլ մշտապես ու գիտակցաբար անտեսում է Բրյուսելի քննադատությունը, ուրեմն հենց նրանք են եվրոպական գաղափարի իսկական գերեզմանափորերը»,- գրում է լրագրողը։ Նրա խոսքով Եվրոպայում աճումէ «ազգայնական մանրոգությունը», երկրներին ավելի շատ հուզում է այն, ինչ իրենց է ձեռնտու՝ թե տնտեսական, թե ներքաղաքական տեսակետից։
Ըստ Die Presse–ի, այդ խնդիրները կարելի է լուծել կառուցվաքային փոփոխությունների միջոցով՝ բաժանելով ԵՄ-ն։ Հոդվածագիրը առաջարկում է ստեղծել «զարգացման երկու տարբեր տեմպերով» Եվրոպա՝ բաժանելով երկրների, որոնք ձգտում են եվրոպական միասնության, ու երկրների, որոնք չեն ուզում համագործակցել։ Երկրորդ խումբը կպահպանի ԵՄ-ին անդամակցությունը, սակայն նվազ քանակության իրավունքներ ու պարտականություններ կունենա։ Հոդվածում նշված չէ,թե խմբերից որ մեկում է զարգացումն ավելի արագ ընթանալու։
Ըստ հոդվածագրի՝ այդ ծրագիրը թույլ կտա ստեղծել նոր ԵՄ։ Գաղափարը կարող է անիրագործելի թվալ, սակայն դրա այլընտրանքը ողբերգական կլինի՝ ամփոփում է լրագրողը։
