Ադրբեջանական զինուժը երեկ ուշ երեկոյան կրկին կրակ է բացել Տավուշի մարզի սահմանամերձ Բաղանիս գյուղի ուղղությամբ: Բաղանիսի գյուղապետ Նարեկ Սահակյանը տեղեկացրել է, որ զոհեր, բարեբախտաբար, չկան: Բաղանիսի ուղղությամբ հակառակորդը կրակ է բացել նաեւ փետրվարի 25-ի առավոտյան:
Նույն օրը հակառակորդ հրադադարի ռեժիմն ակտիվորեն խախտել է նաեւ ղարաբաղա-ադրբեջանական շփման գծում՝ Մարտունի եւ Ակնայի՝ նախկին Աղդամի ուղղություններով: Հայկական կողմի պատասխան գործողությունների հետեւանքով հակառակորդը զոհեր եւ վիրավորներ է ունեցել, մի քանի դիակ չեզոք գոտում է մնացել: Ադրբեջանական կողմի 5 զոհերի թվում են հետախուզության պետ, հետախույզ, վաշտի հրամանատար եւ երկու այլ զինծառայող:
Արցախի պաշտպանության նախարարությունը հակառակորդի ճամբարում տեղի ունեցած հեռախոսազրույցի ձայնագրություն է հրապարակել, որտեղ կանացի ձայնը նկարագրում է ադրբեջանական կողմում տիրող իրավիճակը:
Ադրբեջանական կողմը երկու օր շարունակ չի կարողացել դիերը դուրս բերել չեզոք գոտուց: Հակառակորդը խախտել է պայմանավորվածությունն ու ձախողել դիերի դուրսբերումը: Դա հաջողվել է անել միայն այսօր, Կարմիր խաչի միջազգային կոմիտեի եւ ԵԱՀԿ գործող նախագահի անձնական ներկայացուցչի օգնականների մասնակցությամբ:
Պաշտոնական այցով Բրյուսելում գտնվող նախագահ Սերժ Սարգսյանը Եվրոպական խորհրդի նախագահ Դոնալդ Տուսկի հետ հանդիպմանը քննարկել է ղարաբաղյան հիմնախնդիրը, իսկ համատեղ մամուլի ասուլիսում հայտարարել, որ համակարտությունը ռազմական լուծում չունի: Խնդրի լուծման հարցում էլ, ըստ Սարգսյանի, կարեւորը Լեռնային Ղարաբաղի ժողովրդի կամարտահայտությունն է:
Սերժ Սարգսյանի եւ Դոնալդ Տուսկի հանդիպման կենտրոնական թեման Հայաստան-Եվրամիություն նոր շրջանակային համաձայնագիրն է եղել: Նախագահը գոհունակությամբ արձանագրել է, որ կողմերն ավարտել են բանակցությունները։
Իսկ ղարաբաղյան հակամարտության թեմային անդրադարձ է եղել նաեւ Սերժ Սարգսյանի եւ Եվրոպական ժողովրդական կուսակցության (ԵԺԿ) նախագահ Ժոզեֆ Դոլի հանդիպման ժամանակ: Սերժ Սարգսյանը վստահեցրել է, որ Հայաստանը, ի տարբերություն Ադրբեջանի, բնավ չի ցանկանում, որպեսզի տարածաշրջանը եւս մեկ անգամ ընկղմվի պատերազմի մղձավանջի մեջ:
Բրյուսելում Սերժ Սարգյանը հանդիպելու է նաեւ եվրոպացի այլ բարձրաստիճան պաշտոնյաների, հայ համայնքի գործարար շրջանակների հետ, ինչպես նաեւ ելույթ կունենա «Քարնեգի» հետազոտական կենտրոնում:
Վերահսկիչ պալատի նախագահ Իշխան Զաքարյանի հրաժարականի դիմումի 15-օրյա ժամկետը լրացել է եւ Ազգային ժողովի արձանագրությամբ նրա լիազորությունները դադարեցվել են: Գալուստ Սահակյանը հայտարարել է, որ նախագահն առաջարկել է այդ պաշտոնում նշանակել Լեւոն Յոլյանին: Վերահսկիչ պալատի նախագահի ընտրությունը կկայանա վաղը:
Իսկ այսօր խորհրդարանի դահլիճում բավական լարված է եղել: Խոսրով Հարությունյանը խոսել է նոր Ընտրական օրենսգրքի առավելությունների մասին: Ասել է, որ ապրիլի 2-ի քվեարկության ժամանակ այն բացառում է կարուսելը, հետեւաբար՝ ընտրակաշառք բաժանելու որեւէ շարժառիթ: Հարությունյանին զարմանում է, որ դահլիճում նստած քաղաքական ուժերն ընտրակաշառք բաժանելու համար միայն իշխող կուսակցությանն են մեղադրում: Խոսրով Հարությունյանի հայտարարությունը զայրացրել է Նիկոլ Փաշինյանին: Նրանք միմյանց վրա շարունակել են գոռգոռալ նաեւ խոսափողներն անջատելուց հետո, իսկ Հերմինե Նաղդայանին երկար ժամանակ չէր հաջողվում կարգի հրավիրել պատգամավորներին:
Բարձր տոնի են անցել նաեւ Նաիրա Զոհրաբյանն ու Հերմինե Նաղդալյանը: «Ծառուկյան» դաշինքի նախընտրական ծրագրի դրույթների մասին Զոհրաբյանը ոգեւորված է խոսել, Նաղդալյանն էլ՝ հանգստության կոչ արել:
Խորհրդարանի միջանցքներում էլ լրագրողները «շրջապատել» են մի քանի պատգամավորի: Սամվել Ալեքսանյանից հարցրել են, եթե այս ընտրություններում քաղաքացիներն իրեն բավարար քանակությամբ ձայն չտան, կշարունակի՞ բարեգործություն անել: Նոր խորհրդարանում Սամվել Ալեքսանյանն ուզում է հայտնվել: Ասում է՝ դեռ շատ բան ունի անելու: Ալեքսանյանին պաշտպանության է շտապել Առաքել Մովսիսյանը: Սամվել Ալեքսանյանը շտապել է հանգստացնել ընկերոջը. իրեն հունից հանել չի ստացվի:
Մհեր Սեդրակյանն էլ հերքել է լուրերն այն մասին, որ իր եւ իր որդու նկատմամբ իշխանությունները ճնշումներ են գործադրել, երբ իրենք փորձել են լքել ՀՀԿ-ն ու Հովիկ Աբրահամյանի կողմն անցնել: Նա վստահեցրել է, որ ոչ ոքից նեղացած չէ, պարզապես դուրս է եկել քաղաքականությունից եւ բիզնեսով է զբաղվելու:
Գալուստ Սահակյանից լրագրողները հետաքրքրվել են, թե ինչպես է վերաբերվում հրապարակումներին, որ իր հարսը՝ Երեւանի մանկապարտեզներից մեկի տնօրեն Սեդա Հակոբյանը, օգտագործել է վարչական ռեսուրսները, մարդկանց հրահանգել է հաշվառվել Արաբկիր վարչական շրջանում, որտեղ ՀՀԿ-ից թեկնածու է առաջադրվել իր ամուսինը՝ Արման Սահակյանը: Նույնիսկ Սեդա Հակոբյանի հետ լրագրողի հեռախոսազրույցի ձայնագրություն է տարածվել: Գալուստ Սահակյանը դրանում ոչ մի խնդիր չի տեսնում, ձայնագրությունը տարածողին էլ բանի տեղ չի դնում:
Արագածոտնի մարզում դաժան սպանություն է տեղի ունեցել: Երեւան-Գյումրի ավտոճանապարհին՝ Թլիկ գյուղի տարածքում, ձնակույտի մեջ Mercedes մակնիշի մեքենա են գտել, քիչ այն կողմ՝ երիտասարդի դի: Նրա պարանոցը կտրած է եղել: Նախնական եզրակացության համաձայն՝ երիտասարդը մահացել է դանակի մի քանի հարվածներից: Մահացածը Երեւանի 20-ամյա բնակիչ Կառլեն Գրիգորյանն է: Նա առաքիչ էր, ազատ ժամանակ էլ անձնական մեքենայով «Յանդեքս»-ում էր աշխատում:
Սպանության կասկածանքով ձերբակալվել է Գյումրիի բնակիչ, ժամանակավոր Երեւանում ապրող 25-ամյա Վարդան Հովսեփյանը: Նախնական տեղեկություններով՝ կասկածյալը Լենինգրադյան փողոցում նստել է Կառլենի մեքենան ու պատվիրել մեկնել Գյումրի: Արդեն Թլիկում նա դանակի մի քանի հարվածով կտրել է երիտասարդի պարանոցը, դին դուրս հանել ու փորձել այդ ավտոմեքենայով սպանության վայրից դիմել փախուստի, բայց հայտնվել է ձնակույտի մեջ: Նա հրաժարվել է ցուցմունք տալ:
Իսկ մերձմոսկովյան Դոլգոպրուդնիում հրազենային վնասվածքից Հայաստանի 34-ամյա քաղաքացի է մահացել: Գիշերը տղամարդու մարմինը գտել են շրջանի «Վոդնիկ» սրճարանի մերձակայքում: Մերձմոսկվայում առանց գրանցման բնակվող Էդգար Հակոբյանը մահացել է Շտապօգնության մեքենայում, կրծքավանդակի շրջանում հրազենային վնասվածքից: Դեպքի վայրում ատրճանակի պարկուճ են գտել: Էդգար Հովսեփյանը Հրազդանից էր, երեք մանկահասակ երեխաների հայր:
Կայացել է «Օսկար» մրցանակաբաշխության 89-րդ արարողությունը: Ավադույթի համաձայն՝ այն անցել է ոգեւորիչ հաղթանակների, պարտության հիասթափության մթնոլորտում, աստղերն էլ ցուցադրել են հայտնի դիզայներներից ձեռք բերած վառ ու նորաձեւ զգեստները: Այս տարի «Լավագույն ֆիլմ» է ճանաչվել Բերի Ջենքինսի «Լուսնի լույսը» ժապավենը, «Լավագույն ռեժիսոր»՝ Դեմիեն Շազելը՝ «Լա Լա Լենդ» ֆիլմի համար: «Լավագույն դերասան» է ճանաչվել Քեյսի Աֆլեքը, «Լավագույն դերասանուհի» անվանակարգում հաղթել է Էմմա Սթոունը: Ի դեպ՝ «Օսկար»-ի պատմության մեջ առաջին անգամ բաղձալի արձանիկ է ստացել մահմեդական դերասան՝ Մահերշալա Ալին. նա հաղթող է ճանաչվել «Երկրորդ պլանի լավագույն դերասան» անվանակարգում:
Մրցանակաբաշխության արարողության ժամանակ չի հաջողվել խուսափել նաեւ զավեշտալի իրավիճակներից: Մասնավորապես, «Լավագույն ֆիլմ» անվանակարգում հաղթողին հայտնելիս «Լուսնի լույսը» ֆիլմի փոխարեն նշել են «Լա Լա Լենդ»-ը, բայց արձանիկը ռեժիսորին հանձնելուց հետո պարզվել է, որ սխալմունք է տեղի ունեցել. պարզապես բացել են «Լավագույն դերասանուհի» անվանակարգում հաղթողի ծրարը՝ «Լա Լա Լենդից» գլխավոր դերակատար Էմմա Սթոունի անունով:
Բացի այդ, համացանցում սկսել են ծաղրել նաեւ Նիկոլ Քիդմանին՝ տարօրինակ ձեւով ծափահարելու համար: Սոցցանցերն արդեն հեղեղվել են ծաղրալի մեկնաբանություններով:
Դոլարն ու եվրոն կրկին զիջում են դիրքերը: Փետրվարի 27-ին դոլարի փոխարժեքը կազմել է 486 դրամ, եվրոյինը՝ 515, ռուբլունը՝ 8 դրամ 43 լումա, ֆունտինը՝ 604 դրամ:
Փետրվարի 28-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղոմներ չեն սպասվում: Գիշերը մայրաքաղաքում կդիտվի -7-9 աստիճան ցուրտ, ցերեկը՝ մինչեւ +1 աստիճան տաքություն: