Հայաստանի խորհրդարանի պատգամավորներն այսօր՝ հունիսի 7-ին, 1 րոպե լռությամբ հարգել են Թեհրանում տեղի ունեցած ահաբեկչական հարձակումների հետեւանզով զոհվածների հիշատակը:
«Մենք պետք է դատապարտենք այդ ահաբեկչական ակտերը, մեր համերաշխությունը հայտնենք իրանցի ժողովրդին եւ ասենք, որ ահաբեկչությունն ազգություն ու կրոն չի ճանաչում, ՀՀ խորհրդարանի պատգամավորները մի մարդու նման պետք է դատապարտեն տեղի ունեցածը»,- ասաց ԱԺ փոխնախագահ, նիստը վարող Շարմազանովը:
Նիստերի դահլիճում ներկա սակավաթիվ պատգամավորները մեկ րոպե լռությամբ հարգեցին զոհերի հիշատակը:
Հիշեցնենք, որ կանացի հագուստով չորս զինյալներ ներխուժել են Իրանի խորհրդարան, հարձակման է ենթարկվել նաեւ Իմամ Խոմեյնիի դամբարանը: Իրականացված ահաբեկչությունների հետեւանքով 12 մարդ է զոհվել, վիրավորների թիվը հասել է 39-ի: ԻՊ-ը ստանձնել է պատասխանատվությունը: