Պայմանագրային զինծառայող 29-ամյա Արթուր Զախարյանը վիրավորում է ստացել ոտքի շրջանում, կյանքին վտանգ չի սպառնում: Այս մասին NEWS.am-ին հայտնեցին Արարատի բժշկական կենտրոնից:
«Առաջին բուժօգնություն է ստացել Արարատի բժշկական կենտրոնում, ապա տեղափոխվել Կենտրոնական կլինիկական զինվորական հոսպիտալ: Վիճակը կայուն է»,-նշեցին հիվանդանոցից:
Ավելի վաղ NEWS.am-ը հայտնել էր, որ Հայաստանի զինված ուժերի Արարատի գնդի պայմանագրային զինծառայողներից մեկն այսօր՝ հուլիսի 19-ին, ժամը 13.30-ի սահմաններում ականի պայթյունի հետևանքով վիրավորվել է:
ՀՀ Քննչական կոմիտեց NEWS.am-ին հայտնեցին, որ նրան ահազանգ իրենք ստացել են. «Նման ահազանգ ստացել ենք, Ժամը 13.50-ի սահմաններում N զորամասի տարածքում պայմանագրային զինծառայողը մարտական երթուղուց շեղվել է եւ ստացել բեկորային վնասվածք ոտքի սրունքի շրջանում: Նա անմիջապես տեղափոխվել է բժշկական կենտրոն եւ բուժօգնություն է ստանում: Այս պահին դեպքի վայրում աշխատում է քննչական խումբը, քննություն է տարվում, հանգամանքները պարզվում են»,-նշել են Քննչական կոմիտեից:
