Դոն Պիպոյի՝ Արթուր Ասատրյանի դեմ մահափորձ նախապատրաստելու մեղադրանքով կալանավորված Արկադի Քոչինյանի կալանքի ժամկետը երկարաձգվել է: Այս մասին այսօր՝ հուլիսի 20-ին, NEWS.am-ը տեղեկացավ նրա շահերի պաշտպան Արմինե Ֆանյանից: Նա նշեց, որ իր պաշտպանյալը դեռ շարունակում է մնալ «Նուբարաշեն» ՔԿՀ-ի առանձին խցում: Պաշտպանը դիմել էր ՔԿՀ,  որպեսզի ապահովեն իր պաշտպանյալի անվտանգությունը, Արմինե Ֆանյանի խոսքով, բավարար հիմքեր կան ենթադրելու, որ իր պաշտպանյալին ՔԿՀ-ում վտանգ է սպառնում:

Նշենք, որ Առաջին ատյանի դատարանը բավարարել է նաեւ այս գործով մյուս երեք մեղադրյալների կալանքի ժամկետը երկարաձգելու՝ նախաքաննական մարմնի միջնորդությունը:

Ավելի վաղ տեղեկացրել էինք, որ մի խումբ անձանց կողմից՝ պատվերով, անձի (Դոն Պիպոյի) սպանության նախապատրաստության, զենք-ռազմամթերք ձեռք բերելու եւ պահելու համար մայիսի 27-ին մեղադրանք է առաջադրվել 3 հոգու՝  ՀՀ քրեական օրենսգրքի 35-104-րդ հոդվածի 2-րդ մասի 7-րդ, 8-րդ  կետերով եւ 235-րդ հոդվածի 2-րդ մասով։

Քննությամբ պարզվել է առանձնապես ծանր հանցագործության նախապատրաստության համար անհրաժեշտ փոխադրամիջոցը ձեռք բերելու նպատակով խմբի անդամներին գումար տրամադրած անձի ինքնությունը, եւ որ  խմբի անդամների միջեւ հաղորդակցությունն ապահովելու նպատակով  օգտագործվել են այլ երկրի բջջային օպերատորների հեռախոսաքարտեր։

Նախաքննությունը շարունակվում է։