Բարսելոնում իրագործված ահաբեկչության լույսի ներքո Գերմանիայում ահաբեկչական սպառնալիքը շարունակում է բարձր մնալ: Այս մասին Բեռլինում կայացած ճեպազրույցի ժամանակ հայտարարել է ՆԳՆ պաշտոնական ներկայացուցիչ Յոհանես Դիմրոթը, փոխանցում է «ՌԻԱ Նովոստի»-ն:
«Սպառնալիքի մակարդակը բարձր է, այն բարձր էր երեկվա սարսափելի իրադարձություններից առաջ եւ շարունակում է բարձր մնալ»,- ասել է Դիմրոթը՝ հավելելով, որ «ներկայումս Գերմանիայի հետ ուղիղ կապ չի հայտնաբերվել այն տեղեկությունների համաձայն, որոնք ստացել ենք մեր իսպանացի գործընկերներից»:
«Սակայն ցանկանում եմ ընդգծել, որ սա միջանկլյալ արդյունք է, հետաքննության գործընթացը շատ դինամիկ է ընթանում»,- հավելել է Դիմրոթը:
Նախօրեին ցերեկը Բարսելոնի տուրիստական կենտրոնում ամենագնացը մխրճվել է մարդկանց բազմության մեջ: Ոստիկանությունը միջադեպը ահաբեկչություն է համարել, որի պատասխանատվությունը ստանձնել է ԻՊ ահաբեկչական խմբավորումը: Կատալոնիայի իշխանությունները հաստատել են, որ զոհվել է 14 մարդ, ավելի քան 100 մարդ վնասվածքներ է ստացել: Նրանց թվում կան ավելի քան 20 երկրի քաղաքացիներ: