Առանձնապես խոշոր չափի կաշառք պահանջելու և ստանալու մեջ մեղադրվող՝ Գյումրիի պետական բժշկական քոլեջի աշխատակից Կոզետա Կիրակոսյանն իրեն առաջադրված մեղադրանքը չի ընդունում: Այս մասին NEWS.am-ին ասաց նրա պաշտպան Հայկ Հարությունյանը:
«Նախ եւ առաջ, 69-ամյա Կոզետա Կիրակոսյանը եղել է իրավունքի դասախոս, ընդամենը 1 առարկա է դասավանդել եւ չի եղել պաշտոնատար անձ, ինչպես որ ներկայացնում են: Երկրորդ, այդ ուսանողը, որի համար իբր թե կաշառք են տվել Կոզետա Կիրակոսյանին բացակայությունները հարգելի համարելու համար, հենց առաջին կիսամյակում դուրս է մնացել քոլեջից բացակայությունների պատճառով: Երրորդ, գումարների չափն էլ է խեղաթյուրված: Հիմա շատ բան չեմ կարող ասել, բայց հաղորդում տվողն ու Կոզետա Կիրակոսյանը մտերիմներ են եղել, Կոզետան պարտքով գումար է վերցրել, հետո մի մասը հետ են վերցրել, բայց ոչ 2100 ԱՄՆ դոլար եւ 140 հազար դրամ, ուրիշ չափով է վերցրել: Այստեղ կաշառքի մասին խոսք լինել չի կարող, ամբողջը չափազանցված է, մնացածը արդեն նախաքննությամբ մենք կհիմնավորենք»,- ասաց պաշտպանը:
Ըստ Գլխավոր դատախազության տարածած հաղորդագրության՝ քաղաքացու ահազանգի հիման վրա նախապատրաստված նյութերով տվյալներ են ստացվել, որ Ռուսաստանի Դաշնությունում բնակվող Ի. Ռ-ն եւ Ա. Բ.-ն նախնական համաձայնությամբ, վերջինիս դստեր` Վ. Բ.-ի՝ «Գյումրու պետական բժշկական քոլեջ» ՊՈԱ կազմակերպությունում ընդունելու, ընթացիկ եւ ավարտական քննություններին դրական գնահատականներ ապահովելու եւ արդյունքում մասնագիտական որակավորման փաստը հավաստող դիպլոմ ստանալու նպատակով 2015-2016 թվականների ուսումնական տարվա ընթացքում, ինչպես առձեռն, այնպես էլ բանկային փոխանցումների միջոցով, նույն կազմակերպության աշխատակից եւ արհեստակցական միության նախագահ Կ. Կ.-ին որպես կաշառք մաս-մաս փոխանցել են 140 հազար դրամ եւ 2 հազար 100 ԱՄՆ դոլար գումար:
Վերջինս իր հերթին Վ.Բ-ի օգտին գործողություններ կատարելու նպատակով ապօրինի պահանջել եւ ստացել է այդ գումարը, որից հետո նույն նպատակով Ա. Բ-ից պահանջել է եւս 500 ԱՄՆ դոլար:
Ապօրինի գործողությունների արդյունքում ձեւակերպվել է Ռուսաստանի Դաշնությունում բնակվող եւ հայերեն գրավոր լեզվին բավարար չափով չտիրապետող, ինչպես նաեւ ուսումնառության տարիներին Հայաստանի Հանրապետության տարածքից բացակայած Վ. Բ.-ի ընդունելությունը «Գյումրու պետական բժշկական քոլեջ» ՊՈԱ կազմակերպություն, ինչպես նաեւ դասապրոցեսներին մասնակցությունը եւ դրական քննական գնահատականներ ստանալը:
Կոզետա Կիրակոսյանին մեղադրանք է առաջադրվել Քրեական օրենսգքրի 38-311 հոդվածի 4-րդ մասի 2-րդ կետով: Նա կալանավորված է:
