Ղազախստանի պատվիրակության ղեկավարը հունվարի 1-ին՝ պատմության մեջ առաջին անգամ կնախագահի ՄԱԿ Անվտանգության խորհրդում: Այս կարգավիճակում Աստանայի առաջնահերթություններից են առանց միջուկային զենքի խաղաղության հաստատումը, գլոբալ պատերազմի սպառնալիքի վերացումը, տեղական հակամարտությունների կարգավորումը եւ ահաբեկչության դեմ պայքարը, հաղորդում է Ղազախստանի Արտաքին գործերի նախարարության կայքը:
Աստանայում նաեւ նախատեսում են Կենտրոնական Ասիայի շահերի առաջմղումը` տարածաշրջանային անվտանգության ամրապնդման, Աֆրիկայում խաղաղության հաստատման հարցերի լուծման եւ 21-րդ դարի սպառնալիքներին ու մարտահրավերներին Անվտանգության խորհրդի ու ամբողջ ՄԱԿ-ի համակարգի համապատասխանեցման նպատակներով։
Բացի այդ, Ղազախստանի նախաձեռնությամբ ՄԱԿ-ի Անվտանգության խորհուրդը առաջին անգամ կանցկացնի այն երկրների պաշտոնական դրոշի ծածանման արարողություն, որենք ընտրվել են Խորհրդի նոր ոչ մշտական անդամներ մինչեւ 2019 թ. վերջը՝ Կոտ դ'Իվուար, Քուվեյթ, Նիդեռլանդներ, Պերու, Լեհաստան եւ Հասարակածային Գվինեա:
ՄԱԿ-ի անդամ պետություններից մեկի պատվիրակության ղեկավարը ռոտացիոն կարգով դառնում է Անվտանգության խորհրդի նախագահ: Յուրաքանչյուր երկրի նախագահության ժամկետը մեկ ամիս է: Ղազախստանը ՄԱԿ-ի Անվտանգության խորհրդի 8 ոչ մշտական անդամներից է, անդամակցության ժամկետը լրանում է 2018 թվականի դեկտեմբերի 31-ին:
ԱԽ-ում Աստանան կնախագահի մինչեւ 2018 թ. Հունվարի 31-ը։Նախագահի պարտականությունների շարքում է Խորհրդի գործունեության ընդհանուր կառավարումը, նրա անխափան աշխատանքը ՄԱԿ-ի քարտուղարության աջակցությամբ, ինչպես նաեւ Խորհրդի անունից հայտարարություններ անելը: