ԱՄՆ Ներկայացուցիչների պալատում դեմոկրատական փոքրամասնության առաջնորդ Հաքիմ Ջեֆրիսը CBS News հեռուստաալիքի Face the Nation հաղորդմանը տված հարցազրույցում հայտարարել է, որ դեմոկրատները պատրաստ են երկրի նախագահ Դոնալդ Թրամփի հետ համագործակցության հնարավորություններ փնտրել առողջապահության ոլորտում, ինչպես նաև կյանքի թանկության և ներգաղթի հարցերում։

Ըստ նրա, այս թեմաները կդառնան կուսակցության հիմնական առաջնահերթությունները Կոնգրեսի նոր կազմում, որն իր աշխատանքը կսկսի հաջորդ տարի։

«Կտեսնենք, թե ինչ է հնարավոր անել առողջապահության մասին նախագահի ասածների շրջանակում», — ասել է Ջեֆրիսը։

Միջանկյալ ընտրություններում դեմոկրատների հաղթանակներից հետո կուսակցությունն ակնկալում է վերահսկողություն ստանալ Կոնգրեսի երկու պալատների նկատմամբ։ Վերջին օրերին Թրամփը նույնպես պատրաստակամություն է հայտնել համագործակցելու դեմոկրատների հետ՝ առողջապահությունը նշելով որպես փոխզիջման հնարավոր ոլորտներից մեկը։

«Ես կողմ եմ որակյալ առողջապահությանը։ Կարո՞ղ է այն լինել այնպիսին, ինչպիսին նրանք են ցանկանում տեսնել։ Ո՛չ։ Բայց կարելի է համադրել այն, ինչ բոլորս ենք ցանկանում, և ի վերջո մեր երկրում ստեղծել առողջապահության հիանալի համակարգ։ Հնարավոր է՝ այն ավելի լավը լինի, քան այն համակարգը, որը կստանայինք՝ գործելով հանրապետականների հետ միասին», — ուրբաթ օրը կայացած մամուլի ասուլիսում հայտարարել է նախագահը։

Ջեֆրիսը նշել է մի քանի ուղղություն, որոնց շուրջ երկու կուսակցությունների ներկայացուցիչները կարող են համաձայնության գալ՝ տարեցների համար նախատեսված բժշկական ապահովագրության պետական Medicare ծրագրից օգտվելու իրավունք տվող տարիքային շեմի նվազեցում, ապահովագրական ծածկույթի ընդլայնում՝ ակնաբուժական և ատամնաբուժական ծառայությունները ներառելու համար, ինչպես նաև աջակցություն երեխաների և երիտասարդ ամերիկացիների բուժսպասարկման ծախսերի վճարման հարցում։

«Սա այն ոլորտն է, որտեղ մենք կարող ենք ուսումնասիրել համագործակցության հնարավորությունները։ Ես գիտեմ, որ այս նախաձեռնությունները լայն աջակցություն են վայելում Ներկայացուցիչների պալատի և Սենատի դեմոկրատների շրջանում», — նշել է նա։

Դեմոկրատները նաև մտադիր են հասնել անապահովների բժշկական օգնության պետական Medicaid ծրագրի ֆինանսավորման կրճատումների չեղարկմանը, որոնք նախատեսված են անցյալ տարի հանրապետականների ընդունած One Big Beautiful Bill օրենքով։

Ջեֆրիսի կարծիքով, Կոնգրեսը չի կարող իրեն թույլ տալ անգործության մատնվել կյանքի մատչելիության, առողջապահության և ներգաղթի հարցերում։

«Պատկերացնո՞ւմ եք, թե ամերիկացիները որքան կզայրանան Վաշինգտոնի վրա, եթե առաջիկա երկու տարիների ընթացքում մենք ոչինչ չանենք կյանքի թանկության, առողջապահության և ներգաղթի խնդիրները լուծելու համար», — հայտարարել է նա։

«Տնտեսությունը խաթարված է. չափազանց շատ ամերիկացիների համար դժվար է դարձել նորմալ ապրելը, և ակնհայտ է, որ մենք չենք կարող պարզապես վերադառնալ նախկին վիճակին», — հավելել է քաղաքական գործիչը։ Նա ընդգծել է, որ դեմոկրատները մտադիր են հասնել հասարակության պահանջած լուրջ փոփոխություններին։

Կուսակցության առաջին առաջնահերթություններից մեկը կլինի նաև կոռուպցիայի դեմ պայքարը։ Ջեֆրիսը հայտարարել է, որ դեմոկրատները մտադիր են հասնել Կոնգրեսի, Գերագույն դատարանի և նախագահի վարչակազմի անդամների հաշվետվողականությանը։

«Ոչ մեկի համար բացառություն չի արվի», — ասել է նա։

Մասնավորապես, դեմոկրատները մտադիր են նոր Կոնգրեսի աշխատանքը սկսվելուց կարճ ժամանակ անց առաջարկել Կոնգրեսի անդամներին արգելել բաժնետոմսերով առևտուրը։ Ջեֆրիսը նշել է, որ օրինագծին անհրաժեշտ կլինի երկու կուսակցությունների աջակցությունը։

Մինչդեռ Թրամփի և Ջեֆրիսի հարաբերությունները, որը, ինչպես սպասվում է, կդառնա Ներկայացուցիչների պալատի խոսնակ, առայժմ անորոշ են մնում։ Կիրակի ավելի վաղ ԱՄՆ նախագահը կասկածի տակ էր դրել Սենատում դեմոկրատների առաջնորդ Չաք Շումերի հետ համագործակցության հնարավորությունը, եթե վերջինս դառնա Սենատի մեծամասնության առաջնորդ։

Պատասխանելով Թրամփի իմպիչմենտին հասնելու՝ դեմոկրատների հնարավոր փորձերի մասին հարցին՝ Ջեֆրիսը հայտարարել է, որ կուսակցությունը որևէ տարբերակ չի բացառում։

«Մենք կենտրոնացած ենք կոնկրետ արդյունքների հասնելու և մեր խոստումները կատարելու վրա», — ասել է նա։

Քաղաքական գործչի համոզմամբ, ցանկացած հետաքննություն պետք է իրականացվի փաստերի հիման վրա՝ օրենքին և Սահմանադրությանը համապատասխան։