Իրանում բողոքի ցույցերի հետեւանքով զոհերի թիվը հասել է չորսի, մի քանի հոգի վիրավորվել են, հաղորդում է «ՌԻԱ Նովոստի»-ն՝ վկայակոչելով ILNA գործակալությունը։
«Իզե քաղաքի (երկրի հարավ-արեւմուտքում) բնակիչները այլ քաղաքների բնակիչների պես դուրս են եկել բողոքի ցույցի կապված տնտեսական խնդիրների հետ, որի հետեւանքով, ցավոք սրտի, զոհվել է երկու հոգի, մի քանիսն էլ վիրավորվել են»,-նշել է Իրանի խորհրդարանի այդ շրջանի պատգամավոր Խեդայաթոլահ Հադեմին։
«Ես դեռեւս տեղեկություններ չունեմ, թե ով է երեկ կրակել՝ ցուցարարները թե իրավապահները: Այս հարցը հստակեցվում է »,-ավելացրել է նա:
Իրանի խոշոր քաղաքներում, որոնց թվում են՝ Թեհրանը, Մեշհադը, Սպահանը եւ Ռեշտը, դեկտեմբերի 28-ից զանգվածային ցույցեր են ընթանում: Ավելի վաղ իշխանությունները հաղորդել էին, որ Դորուդ քաղաքում բողոքի ցույցի ժամանակ երկու մարդ է զոհվել՝ նշելով, որ «անվտանգության ուժերը ցուցարարների ուղղությամբ կրակ չեն բացել»:
