Ժիրայր Սեֆիլյանի եւ մյուսների գործով դատական նիստին այսօր` փետրվարի 23-ին, Երեւան քաղաքի ընդհանուր իրավասության դատարանի Շենգավիթ վարչական շրջանի նստավայրում պաշտպանական կողմը հանդես եկավ պաշտպանական ճառով: Ամբաստանյալներից Հրայր Թոփչյանի շահերի պաշտպան Գեորգի Մելիքյանն իր պաշտպանական ճառում դատարանին կոչ արեց արդար դատավճիռ կայացնել` նշելով, որ ակնկալում է, որ դատարանն անտարբերություն չի դրսեւորի այս գործի նկատմամբ ի տարբերություն մեղադրողների: Նա նշեց, որ նախաքննության ընթացքում հետաքննիչը մի շարք չարաշահումներ է թույլ տվել, որոնք բացահայտելու համար մեղադրանքի կողմը ոչինչ չի արել, արդյունքում անթույլատրելի ապացույցները դրվել են գործով ամբաստանյալների մեղադրանքի հիմքում:
«Հանցագործությունը փորձում են հանցագործությունով հիմնավորել. այս պարագայում հետաքննիչը չարաշահումներ է թույլ տվել, որոնց հիման վրա էլ այստեղ ապօրինի մեղադրանք է առաջադրվել անթույլատրելի ապացույցների հիման վրա: Դատաքննության ընթացքում մեղադրանքի կողմը անտարբերություն դրսեւորեց, չդիմեց դատախազություն, որպեսզի բացահայտվեն հետաքննիչի չարաշահումները: Անթույլատրելի ապացույցներ են համարվում 120 փամփուշտներն ու հրազենները, քանի որ ինքնաձիգերը ոչ պիտանի են եղել եւ դրանք հրազեն հանդիսանալ չէին կարող: Եվ հենց այդ անթույլատրելի ապացույցի հիման վրա էլ պաշտպանյալիս մեղադրանք է առաջադրվել: Ես հույս ունեմ, որ դատարանը եւս անտարբեր չի գտնվի, հաշվի կառնի այս հանգամանքը եւ արդար դատավճիռ կկայացնի»,-ասաց նա:
Պաշտպանական ճառով հանդես եկավ նաեւ հանրային պաշտպան Աննա Ջուվանովան, որը պաշտպանում է ամբաստանյալներից Գալուստ Գրիգորյանի եւ Գեւորգ Սաֆարյանի շահերը: Գեւորգ Սաֆարյանը, սակայն, նրան որպես իր շահերի պաշտպան չի ընդունում: Աննա Ջուվանովան նշեց, որ իր պաշտպանյալներին առաջադրված մեղադրանքներում ձեւակերպումները անհատականացված չեն, գործով ձեռք չեն բերվել էական ապացույցներ` իր պաշտպանյալներին առաջադրված մեղադրանքները հիմնավորելու համար եւ հենց այդ հանգամանքով էլ պայմանավորված, պաշտպանյալները չեն հասկանում, թե ինչի մեջ են մեղադրվում: Նա դատարանին կոչ արեց անմեղ ճանաչել եւ Գեւորգ Սաֆարյանին եւ Գալուստ Գրիգորյանին եւ նրանց նկատմամբ արդարացման ակտ կայացնել:
Նշենք, որ եւ Գեւորգ Սաֆարյանը, եւ Գալուստ Գրիգորյանը չեն ընդունում իրենց առաջադրված մեղադրանքները:
Դատական նիստը շարունակվում է:
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
