Շրի Լանկայի երեք եկեղեցիներում եւ երեք հյուրանոցներում պայթյունների հետեւանքով զոհերի թիվը հասել է 185-ի: Ինչպես հաղորդում է News First-ը, զոհվել է նաեւ 11 օտարերկրացի, իսկ The Spectator Index -ը հաղորդում է 35 օտարերկրյա զոհերի մասին:
Այս սուրբ օրով այդ դաժան հարձակումը բացարձակ բարբարոսություն է: Անկախ նրանից, թե ով է պատասխանատու այդ հարձակումների համար, պետք է անհապաղ հետաքննել: Իմ մտքերն ու աղոթքներն այն ընտանիքներին են ուղղված, որոնք կորցրել են հարազատներին, եւ առհասարակ ամբողջ Շրի Լանկային են ուղղված»,-թվիթերյան գրառում է կատարել երկրի նախագահ Մահինդա Ռաջափաքսան:
Տեղի ունեցածը դատապարտել է նաեւ Հնդկաստանի նախագահ Նարենդրա Մոդին: «Խստորեն դատապարտում եմ Շրի Լանկայում տեղի ունեցած սարսափելի պայթյունները: Մեր տարածաշրջանում այդպիսի բարբարոսության համար տեղ չկա: Հնդկաստանն իր համերաշխությունն է հայտնում Շրի Լանկայի ժողովրդին: Իմ մտքերը զոհվածների ընտանիքների հետ են, եւ աղոթքներս՝ վիրավորներին ուղղված»,-գրել է նա թվիթերյան իր էջում:
Ի՞նչ է տեղի ունեցել
Պայթյուններ են որոտացել Շրի Լանկայի խոշորագույն քաղաք Կոլոմբոյի երեք հյուրանոցներում՝ Shangri-La Colombo-ում, Kingsbury Hote-ում եւ Cinnamon Grand Colombo-ում: Կոլոմբոյում եւս մեկ պայթյուն է տեղի ունեցել Սուրբ Անտոնիա եկեղեցում, որը զբոսաշրջիկները հաճախ են այցելում: Երկու այլ եկեղեցիները, որոնք տուժել են պայթյունների հետեւանքով, գտնվում են Կոլոմբոյի հյուսիսում՝ Նեգոմբո քաղաքում, որտեղ գերակշռում է կաթոլիկ բնակչությունը, եւ երկրի արեւելքում գտնվող Բաթիքալոա քաղաքում:
Associated Press-ը, հղում անելով բարձրաստիճան պաշտոնյաներից մեկին, հաղորդում է, որ նախնական տվյալներով՝ եկեղեցիներում առնվազն երկու պայթյուն հավանաբար իրականացվել է մահապարտների կողմից:
Այս կիրակի կաթոլիկները նշում են Զատիկը: Շրի Լանկայում քրիստոնեական եկեղեցիները ներկայացնող NCEASL կազմակերպության տվյալներով՝ 2019 թվականի սկզբից գրանցվել էր քրիստոնյաների նկատմամբ խտրականության, սպառնալիքների եւ բռնության 26 դեպք: Ըստ 2012 թվականի մարդահամարի տվյալների՝ Շրի Լանկայի բնակչության 70 տոկոսը բուդդիստներ են, 12.6 տոկոսը՝ հնդուականներ, 9.7 տոկոսը՝ մահմեդականներ եւ 7.6 տոկոսը՝ քրիստոնյաներ, նշում է Forbes-ը:
Մայրաքաղաքում պայթյունները դիտվում էին որպես սովորական երեւույթ Քաղաքացիական պատերազմի ժամանակ, երբ հակամարտում էին Շրի Լանկայի կառավարությունն ու «Թամիլ Իլամի ազատագրման վագրեր» շարժումը: Պատերազմը ավարտվել է 2009 թվականին եւ այդ ժամանակից ի վեր խոշոր հարձակումներ չեն եղել, հաղորդում է Reuters-ը: