Ferrari ընկերությունում հատուկ կանանց համար սուպերքարի ստեղծման գաղափարը սխալ են համարել, քանի որ ապրանքանիշի հաճախորդներին «նման ավտոմեքենա պետք չէ»։ Այս մասին Arabian Business-ին տված հարցազրույցում հայտարարել է իտալական ապրանքանիշի վաճառքի գծով տնօրեն Էնրիկո Գալիերան։
«Մեզ հայտնի է, որ զգալի թվով կանայք կան, որոնք կուզեին Ferrari վարել։ Ընդ որում, նրանք կնախընտրեին վարել հենց սպորտային ավտոմեքենա, այլ ոչ թե կանանց համար ավտոմեքենա։ Մենք ձգտում ենք պատրաստել մեքենաներ, որոնք նույնչափ ուժեղ զգացմունքներ են առաջացնում ե՛ւ տղամարդկանց, ե՛ւ կանանց մոտ»,- նշել է թոփ-մենեջերը, հայտնում է Autonews-ը։
Գալիերան նաեւ նշել է, որ չափազանց կանացի սուպերքարը կարող է հարված հասցնել ապրանքանիշի վարկանիշին, քանի որ նրա հաճախորդների մեծ մասը տղամարդիկ են։ Միաժամանակ, նա նա ընդգծել է, որ իրենց Ferrari գնող կանանց աճող թիվը չի կարող չուրախացնել։
Վերջապես թոփ-մենեջերը հայտարարել է, որ ապրանքանիշի Roma անունով վերջին սուպերքարն իսկական Ferrari է ստացվել, սակայն ավելի էլեգանտ եւ ավելի պակաս ագրեսիվ՝ համեմատած այլ մոդելների հետ։