2019-ի հրդեհից ի վեր առաջին անգամ Նոտր Դամ տաճարում սուրբծննդյան համերգ է տեղի ունեցել (Փարիզի Աստվածամոր տաճար), փոխանցում է ՏԱՍՍ-ը:
Երեկոյի հատուկ հյուրերն էին ֆրանսիացի հայտնի թավջութակահար Գոտյե Կապյուսոնը եւ օպերային երգչուհի Ժյուլի Ֆուքսը: Վոլֆգանգ Ամադեուս Մոցարտի եի Ֆրանց Շուբերտի ստեղծագործություններից բացի, հնչել են սուրբծննդյան հայտնի երգեր:
«Տաճարը դեռ փխրուն վիճակում է»,- ասել է գեներալ Ժան-Լուի Ժորժելենը, ով պատասխանատու է Նոտր Դամի վերականգնման համար: Այս կապակցությամբ երաժիշտները համերգից առաջ ստացել են անվտանգության բոլոր անհրաժեշտ ցուցումները: Արտիստները, կանոնների համաձայն, ստիպված էին շինարարական սաղավարտներ եւ հատուկ կոմբինեզոններ կրել:
Նշվում է, որ համերգը ցուցադրվել է ձայնագրությամբ, այն տեղի է ունեցել առանց հանդիսատեսի: Ի սկզբանե, ինչպես պատմել է երգչախմբի ղեկավար Անրի Շալեն, նախատեսվում էր, որ ելույթին պետք է մասնակցեր 20 երգիչ, սակայն վերջում մասնակիցների թիվը կրճատվեց` հասնելով ութի:
Նկարահանման հրապարակում պետք է լիներ առավելագույնը 25 մարդ: «Նախկինում մենք գրեթե ամեն երեկո երգում էինք տաճարում, դա մեր երկրորդ տունն էր: Հիմա մենք ուրախ ենք այս հնարավորության համար»,- ասել է Շալեն:
