Պաշտոնաթող գեներալները, որոնք երկրի «կազմալուծման» վերաբերյալ բաց նամակ էին ուղղել Ֆրանսիայի նախագահ Էմանուել Մակրոնին, ռազմական խորհրդի առջեւ կկանգնեն եւ կարող են հեռացվել ծառայությունից, Parisien- ի հետ զրույցում հայտնել է Ֆրանսիայի Զինված ուժերի շտաբի պետ Ֆրանսուա Լեկուանտրը:
Լեկուանտրը նամակը ստորագրածների դեմ միջոցները «բացառիկ ընթացակարգ» է անվանել, որը սկսվել է Ֆրանսիայի պաշտպանության նախարարի խնդրանքով, հաղորդում է «ՌԻԱ Նովոստի»-ն:
«Այս գեներալները անհատապես կանգնելու են Գերագույն ռազմական խորհրդի առջեւ: Այս ընթացակարգից հետո նախագահը (ըստ կանոնների) հրաման է ստորագրում նրանց ծառայությունից հեռացնելու մասին»,- ասել է նա:
Շտաբի ղեկավարը նաեւ նշել է, որ ստորագրածների շարքում 18 գործող զինծառայող կա, որոնցից չորսը՝ սպաներ: Նրանք կարգապահական պատասխանատվության կենթարկվեն: Այժմ դիտարկվում է պատժի աստիճանը, որը կկիրառվի նրանցից յուրաքանչյուրի նկատմամբ:
Լեկուանտրի կարծիքով՝ այդ ուղերձը չի արտացոլում ներկայիս տրամադրությունները զինված ուժերում: «Բանակը հանրապետական է, այն քաղաքականացված չէ, ամեն օր պայքարում է իր երկրի համար»,- հավաստիացրել է նա:
