James Webb տիեզերական հեռադիտակը ստացել է Տիեզերքի ամենախոր, հստակ եւ հանգամանալի պատկերը, տեղեկացրել է ԱՄՆ-ի Աերոնավտիկայի եւ Տիեզերական տարածքի ուսումնասիրման ազգային վարչության (NASA) կայքը։ Սա հեռադիտակից արված առաջին լիարժեք գունավոր լուսանկարն է։

Պատկերն ստացվել է NIRCam-ի՝ հեռադիտակի մերձավոր ինֆրակարմիր հեռադիտակի օգնությամբ։ Լուսանկարում երեւում է SMACS 0723 գալակտիկաների կուտակումը. NASA-ի նկարագրմամբ՝ այն «ծածկում է երկնքի ավազահատիկի չափ տարածքը, որը ինչ-որ մեկը Երկրի վրա պահում է պարզած ձեռքի հեռավորությամբ»։ Լուսանկարը ստեղծվել է մեկ շաբաթվա ընթացքում։

NASA-ում նշել են, որ SMACS 0723-ը գրավիտացիոն լինզա է հեռադիտակի համար եւ մեծացնում է դրա հետեւում գտնվող ավելի հեռավոր գալակտիկաները։ NIRCam-ը կարողացել է որսալ նաեւ այդ գալակտիկաների «մանրագույն կառուցվածքները», նախկինում դրանք նկատելի չէին։

James Webb-ը ամենախոշոր եւ ամենահզոր հեռադիտակն է, որը մարդկությունը երբեւէ ուղարկել է տիեզերք, նշել է Եվրոպական տիեզերական գործակալությունը (ESA)։ Սարքը NASA-ի, ESA-ի եւ Կանադայի տիեզերական գործակալության (CSA) համատեղ արտադրանքն է։ Նրա օգնությամբ գիտնականները կարող են հետազոտել տիեզերքի՝ ինչպես Արեգակնային համակարգի, այնպես էլ այլ գալակտիկաների զարգացման փուլերը։