նախընտրելի դարձնել
Մոտ 400 նավ՝ մոտ 6 հազար ծովայիններով, մնում են արգելափակված Պարսից ծոցում Իրանի հետ պատերազմի սկսվելուց վեց ամիս անց, հաղորդում է dpa-ն։
Միջազգային ծովային կազմակերպությունը (IMO) նախազգուշացրել է, որ անձնակազմերի հազարավոր անդամներ դեռևս գտնվում են բարձր ռիսկի գոտում։
«Թեև որոշ նավերի և նրանց անձնակազմերի հաջողվել է լքել տարածաշրջանը, մինչև 400 նավ՝ մոտ 6 հազար ծովայիններով, չեն կարողացել անվտանգ հեռանալ հակամարտության սկզբից ի վեր», — հայտարարել է IMO-ի գլխավոր քարտուղար Արսենիո Դոմինգեսը։
Կազմակերպության տվյալներով, պատերազմի սկզբից Պարսից ծոցում և Հորմուզի նեղուցի շրջանում արձանագրվել է 70 հարձակում միջազգային նավերի վրա։ Արդյունքում զոհվել է 19 ծովային։
Դոմինգեսը նշել է, որ Պարսից ծոցում և աշխարհի այլ տարածաշրջաններում նավարկության անվտանգության իրավիճակի վատթարացումը սպառնալիք է ստեղծում ծովային փոխադրումների բոլոր մասնակիցների համար, սակայն հատկապես ծանր է մնում այն հազարավոր ծովայինների դրությունը, որոնք հայտնվել են հակամարտության գոտում։
Հորմուզի նեղուցը ԱՄՆ-ի և Իրանի միջև դիմակայության առանցքային հանգույցներից մեկն է։ Մինչև պատերազմի սկիզբը այն բաց էր մնում միջազգային նավագնացության համար։
ԱՄՆ-ն միաժամանակ ծովային գործողություն է իրականացնում Իրանի դեմ։ ԱՄՆ զինված ուժերի Կենտրոնական հրամանատարության (CENTCOM) տվյալներով, շրջափակման շրջանակում ամերիկացի զինվորականներն արդեն փոխել են 82 առևտրային նավի երթուղին, շարքից հանել երեք նավ և բարձրացել ևս երկուսի տախտակամած։
ԱՄՆ նախագահ Դոնալդ Թրամփն ավելի վաղ հայտարարել էր, որ Հորմուզի նեղուցը ականներից մաքրված է, ամբողջությամբ բաց է և 100%-ով վերահսկվում է ամերիկյան ուժերի կողմից։ Սակայն անվտանգության և հետախուզության հարցերով իսրայելցի փորձագետ Դենի Ցիտրինովիչը կասկածի տակ է դրել այս պնդումը։
Ըստ նրա, գիշերային ժամերին նեղուցով տանկերների անցկացումը անջատված տրանսպոնդերներով և ամերիկացի զինվորականների պաշտպանության ներքո դեռևս չի նշանակում նեղուցի լիակատար վերահսկողություն կամ վերադարձ պատերազմից առաջ գոյություն ունեցած պայմաններին։
