Ամերիկայի հայկական համագումարը կոչ է անում ՄԱԿ-ի Գլխավոր ասամբլեայի ղեկավար, Մալդիվների ներկայիս արտաքին գործերի նախարար Աբդուլլահ Շահիդին ճանաչել Հայոց ցեղասպանությունը։
Հիշեցնենք, որ ավելի վաղ Աբդուլլահ Շահիդն այցելել է Հայոց ցեղասպանության զոհերի հուշահամալիր եւ Twitter-ի իր էջում հրապարակել այցի լուսանկարները, սակայն ավելի ուշ ջնջել է թվիթը Թուրքիայի վրդովմունքի ֆոնին։
«Այսօր 31 երկիր եւ տասնյակ միջազգային կազմակերպություններ ճանաչում են 1915-1923 թվականներին Օսմանյան կայսրության կողմից իրականացված Հայոց ցեղասպանությունը։ Ավելի քան մեկուկես միլիոն հայեր դարձել են ցեղասպանության զոհ։
ՄԱԿ-ի Գլխավոր ասամբլեայի ղեկավարի գործողությունները ցույց են տալիս ցեղասպանության ժխտումը, որը ատելության խոսքի վատթարագույն ձեւն է։
1998-ին Ցեղասպանության կոնվենցիայի 50-րդ տարելիցին ոգեկոչելու համար ավելի քան 150 նշանավոր գիտնականներ եւ գրողներ հայտարարություն են տարածել՝ հարգելու Հայոց ցեղասպանության զոհերի հիշատակը եւ դատապարտելու թուրքական կառավարության կողմից մարդկության դեմ այս հանցագործության ժխտումը: Հայտարարության մեջ գիտնականները շեշտել են, որ ցեղասպանության ժխտումը նպատակ ունի փոխել պատմությունը։
ՄԱԿ-ի Գլխավոր ասամբլեայի նախագահ Շահիդի գործողությունները խաթարում են միջազգային հանրության վստահությունը։
Ամերիկայի հայկական համագումարը կոչ է անում ՄԱԿ-ի ԳԱ-ի ղեկավար Շահիդին հրապարակել իր ջնջված թվիթերի հրապարակային բացատրությունը եւ հերքումը եւ վերահաստատել Հայոց ցեղասպանությունը ճանաչելու եւ դրա ժխտումը դատապարտելու իր հանձնառությունը»,-ասվում է հաղորդագրության մեջ։
