Դեկտեմբերի 13-ին Նիդեռլանդների խորհրդարանը մի շարք խմբակցությունների կողմից ներկայացված փաստաթուղթ է ընդունել՝ կապված Ադրբեջանի կողմից Լաչինի միջանցքի փակման հետ։ Այս մասին հայտնում են Նիդեռլանդների Հայկական կազմակերպությունների ֆեդերացիայից։
Փաստաթղթում ասվում է նաեւ, որ չնայած 2020 թվականի նոյեմբերի 9-ի պայմանավորվածություններին, Ադրբեջանը փակել է Հայաստանը Լեռնային Ղարաբաղի հետ կապող Լաչինի միջանցքը եւ դադարեցրել գազի մատակարարումը Հայաստանից Լեռնային Ղարաբաղ։ Փաստաթղթում նշվում է նաեւ, որ «ռուս խաղաղապահները չեն միջամտում այդ տարածքում, եւ սա սպառնում է հումանիտար արտակարգ իրավիճակի ստեղծմամբ Լեռնային Ղարաբաղի բնակչության համար»:
Բացի այդ, խորհրդարանը դիմել է կառավարությանը, որպեսզի վերջինս համատեղ կոչով Ադրբեջանին դիմելու առաջարկ անի Եվրոպայի խորհրդին՝ կոչ անելով դադարեցնել թշնամական գործողությունները Լեռնային Ղարաբաղի ժողովրդի դեմ եւ բացել միջանցքը։