Ադրբեջանի իշխանությունները կոպտորեն օգտվել են ԿԽՄԿ տվյալներից Արցախի քաղաքացի Վագիֆ Խաչատուրյանին անօրինաբար ձերբակալելու համար։

Ինչպես տեղեկացվել էր ավելի վաղ, այսօր Ադրբեջանի կողմից Լաչինի միջանցքի անօրինականորեն դրված անցակետում զննում անցնելիս առեւանգվել է Արցախի քաղաքացի, որին ԿԽՄԿ-ն Արցախից տեղափոխում էր Հայաստան։ ԿԽՄԿ-ն ավելի ուշ պարզաբանել է, որ բոլոր տվյալները տեղափոխվող անձնաց մասին փոխանցվում են կողմերին։

Օգտվելով դրանից՝ Ադրբեջանի իշխանությունները շտապ «մեղադրանք են թխել», որի «հիման վրա» տղամարդն առեւանգվել է։

Ադրբեջանական ԶԼՄ-ներում արդեն հայտնվել է տեղեկություն Խաչատուրյանի կալանավորման մասին ադրբեջանցիների «ցեղասպանությանը հանցակցության» պատճառով։

«Քննությունը պարզել է, որ նշված օրը Ադրբեջանի քաղաքացի, 1955թ. ծնված, Ասկերանի շրջանի Բադարա գյուղի բնակիչ, այդ գյուղում բնակվող Վագիֆ Չերքեզի Խաչատուրյանը, որը վարորդ էր աշխատում Խանքենդիի քաղաքային ավտոտրանսպորտային ձեռնարկությունում, հայազգի այլ անձանց հետ համատեղ Մեշալի գյուղում տարբեր զենքերի կիրառմամբ, այդ թվում հրազեն եւ հետեւակի մարտական մեքենաներ, զինված հարձակում են գործել այդ գյուղի դեմ. սպանվել են ադրբեջանական ազգության 25 անձինք, 14 մարդ տարբեր աստիճանի մարմնական վնասվաքներ է ստացել, 358 մարդ բռնի տեղահանվել է իր օրինական բնակավայրից։ Բացի այդ, Խաչատուրյանը, շարունակելով համատեղ հանցավոր գործողություններն այն անձանց հետ, որոնց հետ ավելի վաղ դավադրության մեջ էր մտել, պետությանը եւ գյուղի բնակիչների ունեցվածքին պատճառել է 5 մլն 496 հազար 900 մանաթ ընդհանուր գումարի վնաս»,- գլխավոր դատախազության հաղորդագրությունը մեջբերել են ադրբեջանական ԶԼՄ-ները։