Հայաստանի կառավարության առաջնային պարտքն է հնարավորինս հոգատար կերպով ընդունել ԼՂ-ից բռնի տեղահանված մեր քույրերին ու եղբայրներին ու ապահովել նրանց ամենահրատապ կարիքները: Այս մասին այսօր՝ սեպտեմբերի 28-ին, կառավարության նիստում հայտարարեց ՀՀ վարչապետ Նիկոլ Փաշինյանը:

Նա խնդրեց փոխվարչապետ Տիգրան Խաչատրյանին ներկայացնել այս պահին առկա վիճակագրությունը ԼՂ-ից Հայաստան ժամանակ բռնի տեղահանվածների մասին:

Փոխվարչապետը նշեց, որ այսօր առավոտյան ժամը 10-ի դրությամբ բռնի տեղահանվածների ընդհանուր թիվը 66 500 է: «Ընդ որում ես ուզում եմ ուշադրություն հրավիրել այն փաստին, որ այս անձանց մեծ մասը, հատկապես Հայաստան է տեղահանվել երեկ և անցյալ օրը, ընդհանուր առմամբ եթե առաջին երկու օրերի ընթացքում՝ սեպտեմբերի 24-ին և 25-ին տեղահանվել էին ընդհանուր թվով 9000 մարդ, ապա միայն ամսի 26-ին տեղահանվածքների թիվը 22,800 է եղել, իսկ երեկ 26,600, իսկ կեսգիշերից մինչև այսօր առավոտյան ժամը 6–ը` 8100։ Ժամանումների ինտենսիվությունը շատ բարձր է»,– ընդգծեց փոխվարչապետը։

Ըստ նրա` օթևան է ստացել մոտ 10 967 քաղաքացի։ Օթևանների բաշխվածությունը, փոխվարչապետի խոսքով, գրեթե նույնն է, միայն մի փոքր շատ են եղել Կոտայքում, Սյունիքում։

«Մենք աշխատում ենք այն անձանց նույնականացնել, ովքեր այդ պահին որևէ կարիքի անհրաժեշտության համար դիմում են մեր պատկան մարմիններին»,- ասել է նա: