նախընտրելի դարձնել
ԱՄՆ նախագահ Դոնալդ Թրամփը հայտարարել է, որ ամերիկյան զինված ուժերն ունեն զինամթերքի գրեթե անսահմանափակ պաշարներ, որոնք զգալիորեն գերազանցում են Իրանում ընթացող ռազմական գործողության պահանջարկը։ Այս մասին նա գրել է Truth Social սոցիալական ցանցում։
«Մենք ունենք միջին և բարձր որակի զինամթերքի գրեթե անսահմանափակ ծավալներ՝ շատ ավելին, քան երբևէ կկարողանայինք օգտագործել այս կամ որևէ այլ պատերազմում», — հայտարարել է Թրամփը։
Նրա խոսքով՝ ԱՄՆ-ն այժմ զինամթերք է արտադրում «այնպիսի ծավալներով, որոնք նախկինում երբեք չեն տեսնվել», ինչպես նաև կուտակում է դրանք հնարավոր ցանկացած ռազմական սցենարի համար։
«Մենք դրանք պահում ենք մեզ՝ Ամերիկայի Միացյալ Նահանգներին, այլ ոչ թե վաճառում ուրիշներին, սակայն դաշնակիցներին մատակարարումները շուտով կվերսկսվեն», — գրել է նախագահը։
Թրամփը նաև համեմատել է ամերիկյան զինամթերքի ընթացիկ օգտագործումը նախկին նախագահ Ջո Բայդենի վարչակազմի օրոք Ուկրաինային տրամադրված ռազմական աջակցության ծավալների հետ։
«Բայդենի վարչակազմը անհամեմատ ավելի շատ զինամթերք է փոխանցել Ուկրաինային, ընդ որում՝ լիովին անվճար, քան մենք օգտագործել ենք Իրանում», — հայտարարել է նա։
Թրամփի պնդմամբ՝ Բայդենի օրոք Ուկրաինային և ՆԱՏՕ-ին նույնպես «հարյուրավոր միլիարդավոր դոլարներ» են տրամադրվել անվճար, թեև, ինչպես կարծում է ԱՄՆ գործող նախագահը, այդ ծախսերը պետք է հոգար Եվրոպան։
«Մենք կպահանջենք այդ փողերը, թեև փոքր-ինչ ուշացումով», — հավելել է Թրամփը։
Գրառման սկզբում ԱՄՆ նախագահը նաև քննադատության է ենթարկել ԶԼՄ-ներին՝ մեղադրելով նրանց Իրանում ԱՄՆ ռազմական գործողությունն «օբյեկտիվորեն չլուսաբանելու» մեջ։
