Հարավային Կորեան որոշել է Ուկրաինայից հետ կանչել իր դեսպանին՝ դիվանագիտական հակամարտության ֆոնին, որը ծագել է, երբ Կիևը հրապարակայնորեն բացահայտել է Սեուլին երկու հյուսիսկորեացի ռազմագերիների փոխանցման մասին տեղեկությունը։ Դրա մասին հինգշաբթի՝ հոկտեմբերի 8-ին, հայտնել են Հարավային Կորեայի ԱԳՆ-ից։

Ինչպես հաղորդում է Reuters-ը, խոսքը վերաբերում է ԿԺԴՀ-ի երկու զինծառայողների, որոնք 2025 թվականի հունվարին ռուսական կողմում Կուրսկի մարզում ընթացող մարտերի ժամանակ գերի էին ընկել ուկրաինական ուժերի կողմից։ Սեպտեմբերի կեսերին նրանք ժամանել են Հարավային Կորեա, որտեղ ապաստան են խնդրել։

Ռազմագերիների փոխանցման մասին հրապարակայնորեն հայտնել էր Ուկրաինայի նախագահ Վլադիմիր Զելենսկին՝ սեպտեմբերի 23-ին ՄԱԿ-ի Գլխավոր ասամբլեայում ունեցած ելույթի ժամանակ։ Դրանից հետո Սեուլը Կիևին մեղադրել է փոխանցման մասին տեղեկությունը չհրապարակելու պայմանավորվածությունը խախտելու մեջ։

Հարավկորեական իշխանությունները պնդում են, որ գաղտնիությունը անհրաժեշտ էր հենց զինծառայողների և նրանց հարազատների անվտանգության համար, որոնք մնում են Հյուսիսային Կորեայում։ Հարավկորեական հետախուզության տվյալներով՝ ռազմագերիների փոխանցումը գաղտնի պահելու առաջարկն առաջինը հենց Ուկրաինան էր արել։

Սակայն Կիևը հերքում է չհրապարակման մասին որևէ համաձայնության գոյությունը։ Ուկրաինայի արտգործնախարար Անդրեյ Սիբիգան ավելի վաղ իրավիճակն անվանել էր դիվանագիտական թյուրիմացություն և հայտարարել, որ Կիևը հույս ունի այն շուտափույթ կարգավորել։

Սեուլը Ուկրաինայից պաշտոնական բացատրություններ և ներողություն է պահանջել։ Հարավային Կորեայի արտգործնախարար Չո Հյոնը հայտնել է, որ ուկրաինացի գործընկերոջից ներողություն պարունակող ուղերձ է ստացել, սակայն հարավկորեական կողմին դա չի բավարարել։

Հարավային Կորեայի արտաքին քաղաքական գերատեսչությունը հայտարարել է, որ ակնկալում է տարաձայնությունների կարգավորում և կշարունակի խորհրդակցությունները Կիևի հետ։ Միաժամանակ, դեսպան Պակ Կի Չանի՝ Սեուլ վերադարձի հստակ ժամկետները չեն ճշտվում։