նախընտրելի դարձնել
Ամերիկացի միլիարդատեր Իլոն Մասկը աջակցել է ԱՄՆ նախագահ Դոնալդ Թրամփի՝ ուկրաինացի առաջնորդ Վլադիմիր Զելենսկու հասցեին հնչեցրած քննադատությանը՝ հայտարարելով, որ նա «չափազանց հեռուն է գնացել»։ Այդ մասին Մասկը գրել է X սոցցանցում՝ մեկնաբանելով Սպիտակ տան պաշտոնական կայքում հրապարակված՝ Թրամփի հայտարարություններով տեսանյութը։
«Զելենսկին չափազանց հեռուն է գնացել», — գրել է Մասկը։
Նախօրեին Թրամփը հայտարարել էր, որ Ուկրաինային ժամանակն է ընտրել նոր նախագահ՝ մեղադրելով Զելենսկուն Ռուսաստանի հետ համաձայնագիր կնքել չցանկանալու և ռուսաստանյան նավթավերամշակող գործարաններին հարվածները շարունակելու մեջ։
«Ես առաջարկում եմ նրանց գտնել նոր առաջնորդ, որը կկարողանա գործարք կնքել, որովհետև նա կարող էր շատ գործարքներ կնքել, բայց ինչ-ինչ պատճառներով դա երբեք չի անում», — ասել է ամերիկացի նախագահը լրագրողներին։ Նա նաև պահանջել է Կիևից դադարեցնել ռուսաստանյան նավթավերամշակող ձեռնարկություններին հասցվող հարվածները՝ պնդելով, որ դրանք սրում են դիզելային վառելիքի պակասը և խնդիրներ ստեղծում ամերիկացի ֆերմերների ու համաշխարհային տնտեսության համար։
Զելենսկին ավելի վաղ կտրուկ քննադատել էր ամերիկյան վարչակազմի որոշումը՝ հայտարարելով, որ պատժամիջոցների թուլացումը Մոսկվային լրացուցիչ եկամուտներ կբերի Ուկրաինայի դեմ պատերազմը շարունակելու համար։ Կիևը նաև պնդում է, որ ռուսաստանյան էներգետիկ ենթակառուցվածքին հասցվող հարվածները միտված են Ռուսաստանի ռազմական ներուժը թուլացնելուն։
