նախընտրելի դարձնելՈստիկանության Նոր Նորքի բաժնի ծառայողները Գայի պողոտայի 16 հասցեում գտնվող սուպերմարկետի հետնամասից հուլիսի 25-ին, ժամը 02.30-ին, զենք-զինամթերք պահելու կասկածանքով, բերման են ենթարկել 13 անձանց: Այս մասին NEWS.am-ին հայտնեցին Ոստիկանությունից:
Բերման ենթարկվածներից 25-ամյա Հրաչ Գ.-ի վարած «Աուդի» մակնիշի ավտոմեքենայի վարորդի նստելատեղի տակից հայտնաբերվել է առանց գործարանային համարի 9 մմ տրամաչափի «Մակարով» ատրճանակ` փամփշտակալի մեջ 8 փամփուշտով, 32-ամյա ծնված Մանուկ Ս.-ի «Մերսեդես» ավտոմեքենայից՝ երկու դանակ, 38-ամյա Վաղարշակ Հ.-ի «Մերսեդես» մակնիշի մեքենայից՝ ծալովի դանակ եւ մանուշակագույն 5 դեղահաբ` «311» գրառումով, 27-ամյա Կարեն Ա.-ի «ԲՄՎ-523» մակնիշի ավտոմեքենայից՝ դեղին գույնի 8 դեղահաբ եւ դանակ:
Նոր Նորքի թիվ 7 շուկայի հետնամասի զննությամբ, այնտեղ կայանված «Մերսեդես», «ԲՄՎ-X5», «ԲՄՎ», «ԲՄՎ-X5» մակնիշի ավտոմեքենաներից 10 մ հեռավորության վրա գտնվող զուգարանի մուտքի մոտ հայտնաբերվել է «Մակարով» ատրճանակ` փամփշտակալի մեջ 8 փամփուշտով: Նշանակվել են դատաքիմիական, դատատեխնիկական եւ դատաձգաբանական փորձաքննություններ:
Բերման ենթարկվածներից 37-ամյա Արտակ Հ.-ն եւ 25-ամյա Հրաչ Գ.-ն ձերբակալված են: Ոստիկանության Նոր Նորքի քննչական բաժնում հարուցվել է քրեական գործ՝ ՀՀ քրեական օրենսգրքի 235 հոդվածի 1-ին մասի հատկանիշներով: Կատարվում է նախաքննություն:
