նախընտրելի դարձնել
Չեմ թերագնահատում որեւէ թեկնածուի հնարավորությունները: Մեր կողմից փորձում ենք ապահովել փոխադարձ հարգանքի ու հանդուրժողականության մթնոլորտ։ Այդ մասին NEWS.am-ի թղթակցի հետ զրույցում ասաց թիվ 1 ընտրատարածքում առաջադրված ԱԺ պատգամավորի ՀՀԿ-ական թեկնածու Ռոբերտ Սարգսյանը։
Պարոն Սարգսյան, ինչպե՞ս եք գնահատում Ձեր հնարավորությունները թիվ 1 ընտրատարածքում:
Բավական բարձր: Թիմը աշխատում է շատ արդյունավետ, մեզ սատարում է համակիրների մեծ բանակ, ինչը մեր հնարավորությունները օբյեկտիվորեն բարձր գնահատելու վստահություն է տալիս: Կարող եմ միանշանակ ասել, որ ընտրությունների արդյունքը լինելու է համոզիչ հաղթանակը:
Թեկնածուներից ո՞ւմ եք իսկական ու լուրջ մրցակից համարում:
Չեմ թերագնահատում որեւէ թեկնածուի հնարավորությունները: Մեր կողմից փորձում ենք ապահովել փոխադարձ հարգանքի ու հանդուրժողականության մթնոլորտ: Ընտրական մրցակցությունը անհրաժեշտություն է եւ, իհարկե, ենթադրում է ապահովել որոշակի կանոններ: Ես բացառապես քաղաքակիրթ, օրինական մրցակցության կողմնակից եմ:
Պետք է նշեմ, որ ընտրությունը ինձ համար ինքնանպատակ չէ եւ ոչ էլ մրցասպարեզ, այլ ճանապարհ օրենսդիր դաշտում աշխատելու համար: Ես վստահության քվե եմ խնդրում ժողովրդից եւ պարտավորություն եմ վերցնում աշխատելու բոլորի համար, ընտրատարածքի բոլոր ընտրողների համար՝ անկախ այն հանգամանքից կողմ են քվեարկելու, թե ոչ:
Ի՞նչ միջոցներով եք պայքարելու, շահելու հասարակության սերը:
Ինչպես արդեն նշեցի, նախընտրական քարոզչության առաջին օրվանից պահպանում ենք թափանցիկ ընտրապայքարի բոլոր ընդունված պայմանները:
Ինչ վերաբերում է հասարակության սերը շահելու հարցին՝ ես համոզված եմ, որ մեր ընտրողները կարող են տարանջատել զուտ սիրաշահելու համար տրվող պոպուլիստական խոստումը , եւ իրատեսորեն գնահատել աշխատանքի նպատակադրվածությունը: Ժողովուրդը վստահության քվե տալով ոչ միայն սպասելիքներ է ձեւավորում, այլեւ պահանջում է համապատասխան աշխատանք: Ես իմ ընտրողներին ներկայացնում եմ, թե ինչի համար եմ պայքարում եւ ինչի դեմ եմ պայքարում: Եվ որ ամենակարեւորն է, իմ ընտրողների համար ձգտում եմ լինել բաց ու մատչելի պատգամավոր, ում հետ համագործակցելով հնարավոր կլինի հետամուտ լինել հասարակությանը հուզող խնդիրների լուծմանը:
Թիվ 1 ընտրատարածքում առաջադրված մեկ այլ թեկնածուն` Ստեփան Սաֆարյանը, ահազանգեր է հնչեցնում թույլատրված ընտրախախտումների մասին: Ինչպե՞ս կմեկնաբանեք այդ ահազանգերը:
Այդ ահազանգերը իրականության հետ ոչ մի ընդհանուր բան չունեն: Եվ համոզված չեմ, որ նման մեթոդներով կարելի է ավելին շահել, քան այն ինչ կա:
Քարոզարշավը ընթացքի մեջ է, եւ ես կուզեի ի սկզբանե բացառել ընտրությունների արդյունքների կանխորոշված լինելուն վերաբերող բոլոր տեսակի խոսակցությունները: Մեր թիմը անում է ամեն ինչ արդար ընտրությունների կայացումն ապահովելու համար: Հավատանք, որ ունենալու ենք մաքուր եւ արդար ընտրություններ:
