Արգենտինայում երկրորդն օրն է շարունակվում են անկարգությունները, որոնք վերաճել են խանութների թալանի: Երկու մարդ զոհվել է, 500 հոգու ձերբակալել են:  Անկարգություններն սկսվել էին դեկտեմբերի 20-ին` երկրի հարավ-արեւմուտքում գտնվող Բարիլոչե զբոսաշրջային քաղաքում, իսկ դեկտեմբերի 21-ին` մի շարք այլ քաղաքներում, հայտնում է ՆՏՎ-ն:  

Բուենոս-Այրեսի իշխանությունները ոստիկանության հատուկ ստորաբաժանումներ են ուղարկել հարյուրավոր մարդկանց հանդարտեցնելու համար, որոնք փորձել են  թալանել քաղաքի ծայրամասի սուպերմարկետը: Հատուկ նշանակության ջոկատի աշխատակիցները կանխել են գրոհը` արցունքաբեր գազ եւ ռետինե փամփուշտներ կիրառելով, հայտնում է BBC-ի ռուսական ծառայությունը:

Արգենտինայի կառավարությունը զանգվածային անկարգությունների մեղավոր է համարում արհմիություններին, որոնք համակրում են ընդդիմությանը: Իշխանությունները հայտարարել են, որ ընդդիմադիրները փորձում են  վարկաբեկել նախագահ Քրիստինա Քիրշներին:

Հիշեցնենք, ավելի վաղ հաղորդվել էր, որ Ագենտինայում թալանը սկսվել էր «աշխարհի վերջին» սպասելիս։