նախընտրելի դարձնելԱպրիլի 16-23-ին Չինաստանի մայրաքաղաքում կայացել է Պեկինի 3-րդ միջազգային կինոփառատոնը: Մրցութային ծրագրում ներկայացված շուրջ 60 երկրի ավելի քան 500 ֆիլմերից մրցանակաբաշխության վերջնական փուլ են անցել 11 երկրի արտադրության 15 ժապավեններ, որոնց թվում էր նաեւ հայկական կինոարվեստը ներկայացնող «Եթե բոլորը» գեղարվեստական լիամետրաժ կինոնկարը: Արցախյան պատերազմի եւ դրա հետեւանքների մասին պատմող այս ֆիլմը նկարահանվել է Հայաստանի անկախության եւ Հայոց բանակի կազմավորման 20-ամյակի առիթով՝ ՀՀ նախագահ Սերժ Սարգսյանի բարձր հովանու ներքո: Ֆիլմի ռեժիսորն է Նատալյա Բելյաուսկենեն, պրոդյուսերները` Միքայել Պողոսյանը եւ Թերեզա Վարժապետյանը:
ՉԺՀ-ում ՀՀ դեսպանության աջակցությամբ եւ հովանավորությամբ կինոփառատոնին ներկայացված այս ֆիլմը ապրիլի 17-ին եւ 18-ին ցուցադրվել է Պեկինի երկու կինոթատրոններում՝ արժանանալով հանդիսատեսի ջերմ ընդունելությանը:
Ապրիլի 23-ին տեղի է ունեցել կինոփառատոնի մրցանակաբաշխության արարողությունը, որին հրավիրված էր նաեւ ՉԺՀ-ում ՀՀ դեսպան Արմեն Սարգսյանը: «Եթե բոլորը» ֆիլմը հաղթող է ճանաչվել երկու անվանակարգերում. «Լավագույն երաժշտություն» մրցանակին արժանացել է կոմպոզիտոր Վահագն Հայրապետյանի կողմից գրված ֆիլմի երաժշտությունը, իսկ «Երկրորդ պլանի լավագույն դերակատար» մրցանակը շնորհվել է անվանի դերասան Վահագն Սիմոնյանին:
