Ընթացիկ տարվա մարտին, ինչպես բնակարանների, այնպես էլ առանձնատների մասով պաշատոնական վիճակագրությունն աճ է արձանագրել նախորդ տարվա նույն ժամանակահատվածի համաձայն:  Այսպես, մայրաքաղաքում ստանդարտ առանձնատան (250 քմ տարածքով, 400 քմ հողատարծքով)  մեկ քմ-ի միջին շուկայական գինն այս փուլում աճել է 16,2 հազ. դրամով:

Ընդ որում առանձնատների «քառակուսու» ամենամեծ աճն արձանագրվել է «Ավան» վարչական շրջանում (20,6 հազ. դրամով),  այնուհետեւ  հաջորդում են  «Էրեբունի» (19,8 հազ. դրամ),  «Քանաքեռ-Զեյթուն» (18,8 հազ. դրամ)  եւ «Դավթաշեն» (18,2 հազ. դրամ): «Կենտրոն» էլիտար թաղամասում էլ միջին գնի աճը կազմել է «ընդամենը»   15,2  հազ. դրամ:

Եթե իրականում արտագաղթ (փորձագետների գնահատականներով` այն տարեկան 15-20 հազ. մարդ է կազմում) գոյություն ունի,  ապա այն կարող է բնակարանների էժանացման հանգեցնել:

Գների դինամիկայի վերաբերյալ հետաքրքիր եզրակացություն արեց «Բարս» ռիելթորական ընկերության  տնօրեն Մարինա Չատինյանը: Նրա խոսքով` Հայաստանը ժամանակին հաջողությամբ խուսափեց գների կտրուկ անկումից, ինչը հետճգնաժամային փուլում արձանագրվել է աշխարհի շատ երկրների շուկաներում:

Մեզ մոտ գների անկումն այդքան կտրուկ չէր, այնպես որ հակառակ գործընթացը նկատելի չէ, իսկ գուցեեւ, ընդհանրապես չկա: Մարինա Չատինյանը կիսում է իր գործընկերների կարծիքը, թե մայրաքաղաքում բնակարանները չեն թանակացել: Ի դեպ, նշենք մի զարմանալի «երեւույթ»: Բացի մայրաքաղաքից, առանձնատները  թանկացել են հանրապետության մյուս քաղաքներում եւս:

Սակայն այստեղ մի  զավեշտ կա. խնդիրն այն է,  որ տարվա ընթացքում առանձնատան «քառակուսին» թանկացել է 6,0%-ով, այն դեպքում,  երբ դոլարը դրամի նկատմամբ ամրապնդվել է  6,6%-ով: Աննշան, սակայն առաջին հայացքից աճի տեմպում «զիգզագները» հանգեցել են դոլարային համարժեքով նույն առանձնատների էժանացման:

Այսպես, այսօր մայրաքաղաքում առանձնատների մեկ քմ-ի միջին շուկայական գինը տարվա ընթացքում նվազել է 4,0 դոլարով, իսկ ընդհանուր գինը` 0,9 հազ, դոլարով:  Այսինքն, դոլարային համարժեքով  մայրաքաղաքում առանձնատների արժեքը  մի թեթեւ շեղվել է դեպի նվազումը:

Երեւանի վարչական շրջաններում ստանդարտ առանձնատան գների վերաբերյալ կոնկերտ տվյալներն արտացոլված են ստորեւ ներկայացված գծապատկերում:


Ալբերտ Խաչատրյան