նախընտրելի դարձնելՍփյուռքի նախարար Հրանուշ Հակոբյանը կոչ է անում սփյուռքի մեր հայրենակիցներին «Եվրատեսիլ-2013» մրցույթում քվեարկել Հայաստանը ներկայացնող Գոռ Սուջյանի օգտին
Նրա կոչում ասվում է.
«Սիրելի´ հայրենակիցներ
Մայիսի 14-18-ը Շվեդիայի Մալմյո քաղաքում տեղի կունենա «Եվրատեսիլ-2013» երգի մրցույթը, որին Հայաստանից մասնակցելու է երգիչ Գոռ Սուջյանը: Ուստի դիմելով ձեզ՝ խնդրում եմ համախմբվել, հետեւել կիսաեզրափակիչ եւ եզրափակիչ մրցույթներին եւ քվեարկել մեր երգչի, ձեր Հայաստանի օգտին:
Ես դիմում եմ բոլոր նրանց, ում հոգին լի է հայկականությամբ, ով պատրաստ է իր ներդրումն ունենալու՝ Հայաստան անունը միջազգային մրցույթում բարձր պահելու գործում: Եթե Եվրոպայում ապրող մեր հայրենակիցները փորձեն մասնակցել մեր շարժմանը, եթե մի փոքր ժամանակ գտնեն մեր երիտասարդ երգչին աջակցելու համար, ապա հաղթանակը անխուսափելի կլինի: Յուրաքանչյուր հաղթանակով պայմանավորվում է ազգի հավաքականությունը, հավատն ու միասնականությունը:
Վստահ եմ, որ Հայրենիքի եւ Սփյուռքի մեր հայրենակիցների տիեզերական էներգետիկան, աղոթքը փոխանցվում է մեր մասնակցին, ուժ, դրական լիցքեր հաղորդում նրան: Ակնհայտ է, որ ձեր բարոյական կորովի, սիրո եւ ջերմության կարիքն ունի Հայաստանը ներկայացնող Գոռ Սուջյանը՝ մեր տաղանդավոր հայորդին, ում պետք է գոտեպնդենք, ուժ տանք, հավատանք նրա ձիրքին ու տաղանդին, եւ հաղթանակը մերը կլինի:
Մաղթանքս է, որ Գոռի ելույթը հաղթական հրավառություն առաջացնի Հայաստանի եւ Սփյուռքի մեր հայրենակիցների սրտերում: Եվ հայի ճակատագրի համար հաղթանակների Մայիսը հաղթական լինի նաեւ «Եվրատեսիլ-2013»-ով, փայլուն նվաճում արձանագրի, որպեսզի Եվրոպայի երկնակամարում ծածանվի մեր հաղթական Եռագույնը, եւ հայ ժողովուրդը, ինչպես շախմատիստների հաղթանակների դեպքում, ըմբոշխնի հպարտության բերկրանքը: Իսկ հաղթանակի կարող ենք հասնել ոչ միայն Գոռի կատարումով, այլեւ մեր միասնականությամբ, մեր քվեարկությամբ: Ակնկալում ենք Ձեր ակտիվ աջակցությունը»:
