նախընտրելի դարձնելՀայաստանի փոխվարչապետ, տարածքային կառավարման նախարար Արմեն Գեւորգյանն այսօր՝ հունիսի 15-ին, Կոտայքի մարզի Բյուրեղավան համայնքում ներկա է գտնվել քաղաքի մանկապարտեզի բացման արարողությանը, ինչպես նաեւ ծանոթացավ քաղաքում իրականացվող ծրագրերի ընթացքին:
ՏԿՆ մամուլի ծառայությունից հայտնում են, որ մանկապարտեզի հիմնանորոգման համար ծախսվել է 165 մլն 900 հազար դրամ, որից 117 մլն 800 հազարը հատկացվել է մարզի առաջնահերթ խնդիրների լուծման առաջին եւ երկրորդ ծրագրերով, իսկ 48 մլն 100 հազարը` ներդրվել է համայնքի կողմից:
Նշվել է, որ 120 երեխայի համար նախատեսված համայնքային մանկապարտեզն ապահովված է անհրաժեշտ ենթակառուցվածքներով եւ գույքով: Ա. Գեւորգյանը շրջայց է կատարել շենքում, ծանոթացել ստեղծված պայմաններին: Նա կարեւորել է համայնքներում բարեկարգ նախակրթարանների առկայությունը եւ ողջունելի համարեց համայնքի մասնակցությունը ծրագրի իրականացմանը:
Փոխվարչապետը մարզպետ Կ. Շահգալդյանի եւ քաղաքապետ Հ. Բալասյանի ուղեկցությամբ ծանոթացել են նաեւ թիվ 1 եւ թիվ 2 դպրոցների հիմնանորոգման աշխատանքների ընթացքին: Թիվ 1 դպրոցի 8 մասնաշենքերի նորոգման համար հատկացվել է 167 մլն 500 հազար դրամ: Վերանորոգման աշխատանքներն իրականացվում են դեռ 2009թ-ից: Այս տարվա ծրագրով հիմնանորոգվում է դպրոցի մեկ մասնաշենք` այդ թվում` արհեստանոցը, ճաշարանը, դահլիճը եւ ենթակառուցվածքները: Վերանորոգվել է նաեւ քաղաքի թիվ 2 դպրոցը: Այդ նպատակով 28 մլն 800 հազար դրամ էր հատկացվել մարզի առաջնահերթ խնդիրների լուծման չորրորդ ծրագրով, որով նախատեսված աշխատանքներն արդեն ավարտվել են:
Փոխվարչապետին ներկայացվել է նաեւ քաղաքի խմելու ջրամատակարարման ցանցի վերականգնման ծրագրի ընթացքը: Այն իրականացվում է «Հայաստանի փոքր քաղաքների ջրամատակարարման ծրագրի» շրջանակում ` «Հայջրմուղկոյուղի» ՓԲ ընկերության կողմից:
«Հայջրմուղկոյուղի» ՓԲ ընկերության գլխավոր տնօրեն Պատրիկ Լորենը տեղեկացրել է, որ Բյուրեղավանում ծրագիրը մեկնարկել է մայիսին: Ծրագրի շրջանակում նախատեսվում է վերականգնել քաղաքի խմելու ջրամատակարարման ցանցը: Մասնավորապես կվերականգնվեն քաղաքը սնող աղբյուրները, կկառուցվեն ջրաբաշխիչ հանգույցներ, քլորակայան, նոր պոմպակայան: Կկառուցվի եւ կվերակառուցվի շուրջ 10 կմ ջրագիծ, կվերանորոգվի օրվա կարգավորիչ ջրամբարը:
Ծրագիրը նախատեսվում է ավարտել մեկ տարի անց: Արդյունքում քաղաքը կապահովվի շուրջօրյա ջրամատակարարմամբ: Ծրագրի արժեքը 380 մլն դրամ է:
«Հայաստանի փոքր քաղաքների ջրամատակարարման ծրագիրը», որն իրականացվում է Վերակառուցման եւ զարգացման եվրոպական բանկի ֆինանսական աջակցությամբ, համայնքային ջրամատակարարման համակարգերի վերականգնում է նախատեսում 17 քաղաքներում եւ գյուղերում:
