Լեստերի համալսարանի հնագետների թիմը Գորշ եղբայրների վանական համալիրի ավերակներում քարե սարկոֆագ է հայտնաբերել: Երբ այն բացել են, պարզվել է ներսում եւս մեկ դագաղ կա` կապարից: Ավելի վաղ,  2012թ. սեպտեմբերին, նույն վայրում միջնադարյան բրիտանական արքա Ռիչարդ  III-ի աճյունն էր հայտնաբերվել:

Ենթադրվում է, որ «դագաղը դագաղի մեջ է» թաղվել XIII կամ XIV դարերում, այսինքն Ռիչարդ  3-րդի մահվանից գրեթե մեկ դար առաջ, հաղորդում է  « Vesti.ru»-ն:

Մասնագետները ներսի դագաղը կտեղափոխեն Հնագիտության եւ հնագույն պատմության համալսարանական դպրոց` այն բացելու համար: Դագաղի երկարությունը 2,12 մետր է, լայնությունը` 0,6 մետր, գլխի եւ ոտքերի մասում`  0,3 մետր: Կապարե դագաղը, վրան խաչի պատկերով, բավականին լավ է պահպանվել:

Հնարավոր «հանգուցյալների» թվում նշվում են Գորշ եղբայրների ուխտի առաջնորդ Փիթեր Սվինսֆելդը, որը մահացել է 1272թ-ին եւ Ուիլյամ Նոթինգհեմը, որը զոհվել է  1330թ-թ-ին: Նշվում է  նաեւ, որ  այդ վայրում լայնորեն տարածված են եղել անանուն հուղարկավորությունները: